قاسىم-جومارت توقايەۆ ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى
پرەزيدەنتكە ۇلتتىق قاۋىپسىزدىك كوميتەتىنىڭ 2022-جىلعى اتقارعان جۇمىستارىنىڭ نەگىزگى قورىتىندىسى جانە الداعى كەزەڭگە ارنالعان جوسپارى تۋرالى باياندالدى.
ەرمەك ساعىمبايەۆ بىلتىر ارناۋلى قىزمەتتى رەفورمالاۋ جانە ونىڭ جۇمىسىن جانداندىرۋ جونىندەگى پرەزيدەنت تاپسىرماسىنىڭ ورىندالعانىن جەتكىزدى. ونىڭ ايتۋىنشا، تەرروريستىك قاتەرلەردى ازايتۋ ءۇشىن الدىن الۋ جۇمىستارى جۇرگىزىلدى. 3 تەررورلىق اكتىگە دايىندىق كەزەڭىندە توسقاۋىل قويىلدى. كەزەكتەن تىس پرەزيدەنتتىك سايلاۋ كەزىندە جاپپاي تارتىپسىزدىكتى جوسپارلاعان راديكالدى توپ جويىلدى. لاڭكەستىك جانە ەكسترەميستىك قىلمىستار جاساعانى ءۇشىن 56 ادام سوتتالدى. تەرروريزم مەن ءدىني ەكسترەميزمگە قاتىسى بار 134 شەتەل ازاماتىنىڭ ەلگە كىرۋ ارەكەتىنىڭ جولى كەسىلدى.
مەملەكەت باسشىسىنا قۇقىق قورعاۋ ورگاندارىمەن بىرلەسىپ، ەلىمىزدەگى كريمينوگەندىك جاعدايدى ايتارلىقتاي جاقسارتقانى تۋرالى مالىمەت بەرىلدى. اسا قاۋىپتى 15 ۇيىمداسقان قىلمىستىق توپ قۇرىقتالىپ، ولاردىڭ 56 باسشىسى جانە بەلسەندى مۇشەلەرى ۇستالدى. 1100 دەن استام قارۋ، 598 گراناتا جانە 31860 وق-ءدارى زاڭسىز اينالىمنان شىعارىلدى. تاركىلەنگەن قارۋدىڭ جارتىسىنا جۋىعى قاڭتار وقيعاسى كەزىندە ۇرلانعان.
ەسىرتكىگە قارسى 130 وپەراتسيا جۇرگىزىلدى. 1,3 توننا ءارتۇرلى ەسىرتكى تاركىلەندى. شەتەلدىك سەرىكتەستەرمەن بىرگە 96 حالىقارالىق جانە وڭىرلىك ەسىرتكى جەتكىزۋ ارناسى توقتاتىلدى. سينتەتيكالىق ەسىرتكى وندىرىسىمەن اينالىسقان 28 زەرتحانا جويىلدى. 32 زاڭسىز كوشى-قون ارناسىنىڭ جولى كەسىلىپ، ولاردى ۇيىمداستىرۋشىلارعا قاتىستى 12 قىلمىستىق ءىس قوزعالدى.
مەملەكەتتىك قۇپيالاردى قورعاۋ جۇيەسىن دامىتۋ جونىندە كەشەندى شارالار ىسكە اسىرىلدى. ۇ ق ك تەحنيكالىق قىزمەتتەرى اسا ماڭىزدى ينفراقۇرىلىم وبەكتىلەرىنە جاسالعان 341,8 ميلليون كيبەر جانە 2954 DDoS- شابۋىلعا توقساۋىل قويدى.
مەملەكەتتىك شەكارانى بۇزعان 15603 ادام ۇستالدى. شەكارا ارقىلى قۇنى 21,9 ميلليارد تەڭگە بولاتىن ۆاليۋتا، التىن جانە وزگە تاۋارلاردى زاڭسىز وتكىزۋگە جول بەرىلمەدى.
كەزدەسۋ سوڭىندا مەملەكەت باسشىسى ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار ناقتى تاپسىرما بەردى.
