مەملەكەت باسشىسى «قازپوشتا» ا ق باسقارما ءتوراعاسى اسەل جاناسوۆانى قابىلدادى
پرەزيدەنتكە ۇلتتىق پوشتا وپەراتورىنىڭ دامۋ ستراتەگياسى تانىستىرىلدى، دەپ حابارلايدى قازاقپارات اقورداعا سىلتەمە جاساپ.
اسەل جاناسوۆانىڭ ايتۋىنشا، قارجىلىق جاعدايدى وڭالتۋ، الەۋمەتتىك بانكتى دامىتۋ جانە قارجىلىق قىزمەتتەردىڭ ءرولىن كۇشەيتۋ، قولدانىستاعى ينفراقۇرىلىمدار بازاسىندا مەملەكەتتىك قىزمەتتەردى ۇسىنۋ مۇمكىندىگىن كەڭەيتۋ، سونداي-اق ەلەكتروندى كوممەرتسيا مەن حالىقارالىق سالەمدەمەلەرگە باسا ءمان بەرە وتىرىپ، ءداستۇرلى پوشتا بيزنەسىنىڭ تيىمدىلىگىن ارتتىرۋ باسىم باعىتتار بولادى.
سونىمەن قاتار، قاسىم-جومارت توقايەۆقا بيزنەسكە اۋىلدىڭ ءاربىر تۇرعىنىنا قىزمەت كورسەتۋ جانە تاۋار جەتكىزۋ مۇمكىندىگىن بەرۋ ءۇشىن كومپانيانىڭ ينفراقۇرىلىمىن، لوگيستيكالىق جانە بولىمشەلىك جەلىسىن دامىتۋعا قاتىستى جوسپارى تۋرالى مالىمەت بەرىلدى.
كەزدەسۋ سوڭىندا مەملەكەت باسشىسى ايماقتارداعى پوشتا وپەراتورى جۇمىسىنىڭ الەۋمەتتىك ماڭىزدىلىعىنا نازار اۋدارىپ، اتالعان باعىتتار جونىندەگى ستراتەگيانى جۇزەگە اسىرۋ ءىسىن جالعاستىرۋدى تاپسىردى.
