ەكونوميكانى ءارتاراپتاندىرۋ قارقىنىن باسەڭدەتۋگە بولمايدى - سمايىلوۆ

None
استانا. قازاقپارات - ەكونوميكانى ءارتاراپتاندىرۋ قارقىنىن تومەندەتۋگە جول بەرۋگە بولمايدى. بۇل تۋرالى پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«ەكونوميكانى ءارتاراپتاندىرۋ مينيسترلىكتىڭ نەگىزگى مىندەتتەرىنىڭ ءبىرى سانالادى. بۇل دەگەنىمىز - وڭدەۋ ونەركاسىبىندە جاڭا وندىرىستەر قۇرۋ. وتكەن جىلدىڭ قورىتىندىسىندا 2 تريلليون تەڭگەدەن استام سوماعا 160 يندۋستريالىق جوبا پايدالانۋعا بەرىلدى. دەگەنمەن، بيىلعى جوبالاردى ىسكە قوسۋ جوسپارى 1,1 تريلليون تەڭگە سوماعا ارنالعان نەبارى 149 جوباعا دەيىن تومەندەتىلگەن. ەكونوميكانى ءارتاراپتاندىرۋ قارقىنىن تومەندەتۋگە جول بەرۋگە بولمايدى دەپ سانايمىن»، - دەدى ءاليحان سمايىلوۆ يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا.

وسىعان وراي، ۇكىمەت باسشىسى اكىمدىكتەرمەن بىرلەسىپ، سالادا جۇزەگە اسىرىلاتىن يندۋستريالىق جوبالار پۋلىن قىسقا ۋاقىتتىڭ ىشىندە كەڭەيتۋدى تاپسىردى.

«وڭىرلەرگە ساپارىمىز بارىسىندا كاسىپكەرلەردىڭ الۋان ءتۇرلى قىزىقتى جوبالارعا كوپتەپ باستاما جاسايتىندىعىن كورىپ ءجۇرمىز. ارينە، ينفراقۇرىلىممەن، ەنەرگەتيكامەن جانە باسقا دا جايتتارمەن بايلانىستى ماسەلەلەر بار. بۇل ماسەلەلەردى جەرگىلىكتى اتقارۋشى جانە باسقا دا مەملەكەتتىك ورگاندارمەن نەمەسە دەڭگەيىنە قاراي ۇكىمەتتە بىرلەسە شەشۋىمىز قاجەت. بۇل جۇمىستا مونوقالالاردى دا دامىتۋدى ەسكەرۋ وتە ماڭىزدى. جاڭا قالالار حالىقتى قوسىمشا جۇمىسپەن قامتاماسىز ەتە الادى»، - دەدى ۇكىمەت باسشىسى.

وسى رەتتە پرەمەر-مينيستر ساران قالاسىندا تاتنەفت كومپانياسىمەن بىرگە پايدالانۋعا بەرىلگەن دوڭگەلەك شىعاراتىن زاۋىتتى مىسالعا كەلتىردى. قازىرگى ۋاقىتتا اتالعان زاۋىتتا قالانىڭ مىڭنان استام تۇرعىنى جۇمىس ىستەپ ءجۇر.

«مينيسترلىك وسىنداي جوبالاردى كوبەيتۋى قاجەت. وسى ورايدا، مەملەكەت باسشىسى وڭدەۋشىلەردى قولجەتىمدى باعاداعى قاجەتتى شيكىزات كولەمىمەن قامتاماسىز ەتۋدى تاپسىرعانىن اتاپ وتكىم كەلەدى. مينيسترلىك وتاندىق وڭدەۋشى كاسىپورىنداردى بازالىق شيكىزاتپەن قامتاماسىز ەتۋى ءتيىس. سونىمەن قاتار، مينيسترلىكتىڭ باسقا مەملەكەتتىك ورگاندارمەن بىرلەسىپ، كاسىپورىندارعا ونىمدەرىن ساتۋعا قولداۋ كورسەتۋدى كۇشەيتۋى دە ماڭىزدى»، - دەدى ول.

سوڭعى جاڭالىقتار