قاسىم-جومارت توقايەۆ ب ا ءا پرەمەر-ءمينيسترىن قازاقستانعا شاقىردى

None
استانا. قازاقپارات - قاسىم-جومارت توقايەۆ ب ا ءا ۆيتسە-پرەزيدەنتى، پرەمەر-ءمينيسترى، دۋباي امىرلىگىنىڭ بيلەۋشىسى شەيح مۇحاممەد بەن راشيد ءال ماكتۋممەن كەزدەستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

مەملەكەت باسشىسى قوناقجايلىق كورسەتكەنى ءۇشىن شەيح مۇحاممەد بەن راشيد ءال ماكتۋمعا العىس ايتىپ، بىرىككەن اراب امىرلىكتەرىنە جاساعان رەسمي ساپارى اياسىندا ناتيجەلى كەلىسسوزدەر جۇرگىزىلگەنىن جانە ەكى ەل اراسىندا ماڭىزدى ەكىجاقتى كەلىسىمدەرگە قول جەتكىزىلگەنىن اتاپ ءوتتى.

اڭگىمەلەسۋ بارىسىندا پرەزيدەنت قاسىم-جومارت توقايەۆ «استانا» حالىقارالىق قارجى ورتالىعى امىرلىكتەردىڭ باستى قارجى ينستيتۋتتارىمەن قارىم-قاتىناس ورناتقانىنا توقتالىپ، ەكى ەلدىڭ ىسكەر توپتارى اراسىنداعى بايلانىستى جانداندىرۋ ماسەلەسىنە نازار اۋداردى.

ءوز كەزەگىندە شەيح مۇحاممەد بەن راشيد ءال ماكتۋم قازاقستان مەن امىرلىكتەر اراسىنداعى ەكونوميكالىق ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى.

كەزدەسۋ سوڭىندا مەملەكەت باسشىسى قاسىم-جومارت توقايەۆ ب ا ءا ۆيتسە-پرەزيدەنتى، پرەمەر-ءمينيسترى، دۋباي امىرلىگىنىڭ بيلەۋشىسىن قازاقستانعا رەسمي ساپارمەن كەلۋگە شاقىردى.

شەيح مۇحاممەد بەن راشيد ءال ماكتۋم پرەزيدەنتتىڭ شاقىرۋىن قابىل الىپ، قازاقستانعا ساپار شەگۋ زور مارتەبە ەكەنىن ايتتى.

سوڭعى جاڭالىقتار