قاسىم-جومارت توقايەۆ پەن ب ا ءا پرەزيدەنتى شەيح مۇحاممەد بەن زايد ءال ناحاياننىڭ بىرلەسكەن مالىمدەمەسى

استانا. قازاقپارات - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايان بىرلەسكەن مالىمدەمەسىن جاريالادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

1. قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقايەۆ بىرىككەن اراب امىرلىكتەرىنىڭ پرەزيدەنتى بيىك مارتەبەلى شەيح مۇحاممەد بەن زايد ءال ناحاياننىڭ شاقىرۋىمەن 2023-جىلعى 16-18- قاڭتاردا بىرىككەن اراب امىرلىكتەرىنە رەسمي ساپار جاسادى.

2. پرەزيدەنتتەر كەزدەسۋ بارىسىندا ساياسي-ديپلوماتيالىق، ساۋدا-ەكونوميكالىق جانە مادەني ىنتىماقتاستىقتى كەڭەيتۋ جولدارىن قاراستىرىپ، ءبىرقاتار حالىقارالىق جانە وڭىرلىك ماسەلەلەر بويىنشا پىكىر الماستى.

3. مەملەكەت باسشىلارى قازاقستان مەن امىرلىكتەر اراسىنداعى ەكىجاقتى ىنتىماقتاستىقتىڭ تىعىز ديالوگ شەڭبەرىندە جانە ءوزارا سەنىم مەن سىيلاستىق اۋانىندا دامىپ، ەكى ەل حالىقتارىنىڭ مۇددەلەرىنە وراي ءتۇرلى سالاداعى سەرىكتەستىكتىڭ نىعايىپ كەلە جاتقانىن اتاپ ءوتتى.

4. تاراپتار ەكى ەل اراسىنداعى جەمىستى ەكونوميكالىق سەرىكتەستىكتىڭ ماڭىزدىلىعىن راستاي وتىرىپ، ۇلتتىق مۇددەلەرگە سايكەس ەكىجاقتى ەكونوميكالىق ىنتىماقتاستىقتى ءارى قاراي تەرەڭدەتۋگە نيەت ءبىلدىردى. ونىڭ ىشىندە جاڭارتىلاتىن ەنەرگەتيكا، ازىق-تۇلىك قاۋىپسىزدىگى مەن اۋىل شارۋاشىلىعى، تاۋ-كەن، كولىك-لوگيستيكا، قۇرىلىس-ديەۆەلوپمەنت جانە حالىقارالىق قارجى ورتالىقتارى اراسىنداعى ىنتىماقتاستىق سىندى پەرسپەكتيۆالى باعىتتاردى تالقىلادى.

پرەزيدەنتتەر ەكى ەل اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمنىڭ راتيفيكاتسيالانۋىن جوعارى باعالاپ، ونىڭ ەكىجاقتى ەكونوميكالىق قارىم-قاتىناستاردى جاڭا دەڭگەيگە كوتەرەتىنىن اتاپ ءوتتى.

5. تاراپتار مادەني الماسۋلاردى تەرەڭدەتۋ، سونداي-اق تۋريزم، سپورت، ءبىلىم، عىلىم جانە دەنساۋلىق ساقتاۋ سالالارىنداعى ىنتىماقتاستىقتى كەڭەيتۋ حالىقتاردى جاقىنداستىرۋدا، ولاردىڭ اراسىنداعى تۇسىنىستىكتى تەرەڭدەتۋدە، مادەنيەتتەردى ءوزارا بايىتۋ مەن ەكىجاقتى قاتىناستاردى دامىتۋدا ماڭىزدى بولىپ تابىلاتىنىن اتاپ ءوتىپ، وسى سالالارداعى ىنتىماقتاستىقتى نىعايتۋعا كەلىستى.

6. قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقايەۆ جانە بىرىككەن اراب امىرلىكتەرىنىڭ پرەزيدەنتى بيىك مارتەبەلى شەيح مۇحاممەد بەن زايد ءال ناحايان حالىقارالىق قاۋىپسىزدىك پەن ورنىقتى دامۋ ىستەرىندەگى بىرىككەن ۇلتتار ۇيىمىنىڭ ءرولىن كۇشەيتۋگە ەرەكشە ءمان بەردى.

ءوز كەزەگىندە، قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقايەۆ بىرىككەن اراب امىرلىكتەرىنىڭ 2022-2023-جىلدارى بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى ءتيىمدى ءرولىن جوعارى باعالادى.

7. قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقايەۆ بىرىككەن اراب امىرلىكتەرى وكىلدەرىنىڭ 2022-جىلعى 14-15- قىركۇيەك ارالىعىندا استانادا وتكەن الەمدىك جانە ءداستۇرلى دىندەر ليدەرلەرىنىڭ VII سەزىنىڭ جۇمىسىنا بەلسەندى تۇردە قاتىسقانىنا العىس ءبىلدىردى. تاراپتار سەزدىڭ بارلىق باستامالارىن، سونداي-اق ءدىن ليدەرلەرىنىڭ ءدىنارالىق، مادەنيەتارالىق جانە وركەنيەتارالىق ديالوگقا جاردەمدەسۋ جونىندەگى كۇش-جىگەرىن جالعاستىرۋعا كەلىستى.

8. بىرىككەن اراب امىرلىكتەرىنىڭ پرەزيدەنتى بيىك مارتەبەلى شەيح مۇحاممەد بەن زايد ءال ناحايان دوستاس قازاقستان رەسپۋبليكاسىنا دۇنيەجۇزىلىك ساۋدا ۇيىمىنىڭ 13- مينيسترلىك كونفەرەنتسياسىن 2024-جىلعى اقپان ايىندا ءابۋ دابي قالاسىندا وتكىزۋدى قولداعانى ءۇشىن العىسى مەن ريزاشىلىعىن ءبىلدىردى.

سونىمەن قاتار، بيىك مارتەبەلى پرەزيدەنت بىرىككەن اراب امىرلىكتەرىنىڭ شاڭحاي ىنتىماقتاستىعى ۇيىمىنا ديالوگ بويىنشا سەرىكتەس رەتىندە قوسىلۋىنا قازاقستاننىڭ قولداۋ كورسەتكەنى ءۇشىن ريزاشىلىعىن ءبىلدىرىپ، ەكى ەل اراسىنداعى كوپجاقتى ىنتىماقتاستىق باعىتىنداعى ءىس-قيمىلدىڭ ودان ءارى دامي بەرەتىنىنە سەنىم ءبىلدىردى.

9. پرەزيدەنتتەر ازياداعى ءوزارا ءىس-قيمىل جانە سەنىم شارالارى جونىندەگى كەڭەستى تولىققاندى حالىقارالىق ۇيىمعا اينالدىرۋعا جانە ونىڭ الەۋەتىن بىرلەسىپ دامىتۋعا ءوز نيەتتەرى مەن قولداۋلارىن ءبىلدىردى.

تاراپتار حالىقارالىق جانە وڭىرلىك دەڭگەيدە ەكى ەل كوتەرگەن حالىقارالىق باستامالار بەيبىتشىلىكتى، ورنىقتى دامۋدى جانە جالپىادامزاتتىق قۇندىلىقتاردى نىعايتۋعا قىزمەت ەتەتىنىن اتاپ ءوتتى.

10. تاراپتار ەكى ەلدىڭ وڭىرلىك جانە حالىقارالىق اۋقىمدا سەنىم مەن ءوزارا تۇسىنىستىك احۋالىن ورناتۋعا جانە قولداۋعا دەگەن ۇمتىلىسىن، سونداي-اق حالىقارالىق ماسەلەلەردى تەك ديپلوماتيالىق قۇرالدار ارقىلى بەيبىت جولمەن شەشۋ قاجەتتىگىن اتاپ ءوتتى.

11. بىرىككەن اراب امىرلىكتەرىنىڭ پرەزيدەنتى بيىك مارتەبەلى شەيح مۇحاممەد بەن زايد ءال ناحايان قازاقستان رەسپۋبليكاسىنىڭ حالىقارالىق بيولوگيالىق قاۋىپسىزدىك ۇيىمىن قۇرۋ جونىندەگى باستاماسىنا قولداۋ ءبىلدىردى.

12. قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقايەۆ بىرىككەن اراب امىرلىكتەرىنىڭ پرەزيدەنتى بيىك مارتەبەلى شەيح مۇحاممەد بەن زايد ءال ناحايانعا جىلى شىرايمەن قابىلداعانى جانە جوعارى دەڭگەيدەگى قوناقجايلىلىعى ءۇشىن شىنايى العىسىن ءبىلدىرىپ، ونى قازاقستانعا رەسمي ساپارمەن كەلۋگە شاقىردى. شاقىرۋ قابىلداندى.