ق ر پرەزيدەنتى ب ا ءا پرەزيدەنتى شەيح مۇحاممەد بەن زايد ءال ناحايانمەن كەلىسسوز جۇرگىزدى

None
استانا. قازاقپارات - مەملەكەت باسشىسى قاسىم-جومارت توقايەۆ بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايانمەن كەلىسسوز جۇرگىزدى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قاسىم-جومارت توقايەۆتى سالتاناتتى قارسى الۋ ءراسىمى «ءال-ۋاتان» سارايىندا ءوتتى.

مەملەكەت باسشىسىنىڭ قۇرمەتىنە 21 رەت زەڭبىرەكتەن وق اتىلىپ، قازاقستاننىڭ ءانۇرانى ورىندالدى. قاسىم-جومارت توقايەۆ پەن شەيح مۇحاممەد بەن زايد ءال ناحايان ءبىر-بىرىنە ءىلتيپات ءبىلدىرىپ، قۇرمەت قاراۋىلىنىڭ باستىعى مەملەكەتتەر باسشىلارىنا راپورت بەردى. پرەزيدەنتتەر ەكى ەلدىڭ رەسمي دەلەگاتسيا مۇشەلەرىن تانىستىرعاننان كەيىن قاسىم-جومارت توقايەۆ قۇرمەتتى قوناقتار كىتابىنا قولتاڭبا قالدىردى.

سالتاناتتى قارسى الۋ راسىمىنەن كەيىن ەكى ەل باسشىلارى كەڭەيتىلگەن قۇرامدا كەلىسسوز جۇرگىزدى.

مەملەكەت باسشىسى قۇرمەت كورسەتكەنى ءۇشىن شەيح مۇحاممەد بەن زايد ءال ناحايانعا العىس ايتتى. سونداي-اق بيىل شەتەلگە العاشقى رەسمي ساپارى بىرىككەن اراب امىرلىكتەرىنەن باستالىپ وتىرعانىن اتاپ ءوتىپ، ەكى ەلدىڭ ىنتىماقتاستىعىن نىعايتۋدا بۇل ساپاردىڭ ماڭىزى زور ەكەنىنە نازار اۋداردى.

- امىرلىكتەر - يسلام جانە اراب الەمىندەگى ءبىزدىڭ سەنىمدى ءارى باستى ستراتەگيالىق سەرىكتەسىمىز. ءسىزدىڭ ەلىڭىز تاۋەلسىزدىكتىڭ العاشقى جىلدارىنان باستاپ قازاقستانعا قولداۋ كورسەتىپ كەلەدى. قازاق حالقى مۇنى ەشقاشان ۇمىتپايدى. اسىرەسە، ەلوردامىزدى كوركەيتۋگە اراب امىرلىكتەرى زور ۇلەس قوستى. بۇل - شىنايى دوستىقتىڭ ايقىن كورىنىسى، - دەدى مەملەكەت باسشىسى.

قاسىم-جومارت توقايەۆ بىلتىر قازاقستان مەن ب ا ءا اراسىندا ديپلوماتيالىق قاتىناس ورناعانىنا 30 جىل تولعانىن ەسكە سالدى. سونىمەن بىرگە وسى كەزەڭدە ءتۇرلى سالاداعى ىنتىماقتاستىق نىعايا تۇسكەنىن، ەكى ەل اراسىندا مازمۇندى ءارى اشىق ساياسي ديالوگ ورناعانىن اتاپ ءوتتى.

- ەكى ەلدىڭ قارىم-قاتىناسىندا ءتۇرلى سالادا جەتىستىكتەر از ەمەس. دەگەنمەن ەكى مەملەكەت اراسىنداعى ىنتىماقتاستىققا تىڭ سەرپىن بەرەتىن كەز كەلدى. وسى ءساتتى پايدالانىپ، سىزگە زور العىسىمدى بىلدىرەمىن، - دەدى پرەزيدەنت.

ءوز كەزەگىندە بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايان 1992-جىلى ديپلوماتيالىق قارىم-قاتىناس ورناتىلعاننان بەرى ەكى ەلدىڭ ىنتىماقتاستىعى جوعارى دەڭگەيگە كوتەرىلگەنىنە توقتالىپ، قازاقستانمەن ساياسي جانە ەكونوميكالىق بايلانىستار اياسىن كەڭەيتۋگە نيەتتى ەكەنىن جەتكىزدى.

- ەلدەرىمىزدىڭ ەنەرگەتيكا، عارىش، تەحنولوگيا، ساۋدا سالالارىنداعى ىنتىماقتاستىق الەۋەتى جوعارى دەپ سانايمىز. وسى ساپار بارىسىندا جاڭارتىلاتىن ەنەرگيا سالاسىندا ماڭىزدى قۇجاتتارعا قول قويىلدى. كەلىسىلگەن جوبالاردىڭ تولىققاندى جۇزەگە اساتىنىنا زور ءۇمىت ارتامىن. ەلدەرىمىزدىڭ اۋاعا تارالاتىن كومىرتەگى مولشەرىن ازايتۋ جونىندەگى جوسپارلارى دا ۇقساس. بىرىككەن اراب امىرلىكتەرى كومىرتەگى بەيتاراپتاعىنا 2050-جىلعا دەيىن جەتۋدى جوسپارلاسا، قازاقستان بۇل ماقساتتى 2060-جىلعا دەيىن ورىنداۋدى كوزدەپ وتىر. بۇل - ءبىزدىڭ بولاشاق ۇرپاق ءۇشىن وتە ماڭىزدى ماسەلە، - دەدى بىرىككەن اراب امىرلىكتەرىنىڭ پرەزيدەنتى.

كەلىسسوز بارىسىندا قازاقستان مەن بىرىككەن اراب امىرلىكتەرىنىڭ اراسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋدىڭ باسىم باعىتتارى تالقىلاندى. اتاپ ايتقاندا، تاراپتار جاڭارتىلاتىن ەنەرگەتيكا، ازىق- تۇلىك قاۋىپسىزدىگى مەن اۋىل شارۋاشىلىعى، تاۋ- كەن، كولىك- لوگيستيكا، قۇرىلىس-ديەۆەلوپمەنت جانە حالىقارالىق قارجى ورتالىقتارى اراسىنداعى ىنتىماقتاستىق سىندى پەرسپەكتيۆالى سالالار بويىنشا ەكىجاقتى ىنتىماقتاستىقتى نىعايتۋ جونىندە ۋاعدالاستى.

ەكىجاقتى ىنتىماقتاستىقتىڭ باسقا دا باسىم باعىتتارى مەملەكەت باسشىسى قاسىم-جومارت توقايەۆ پەن بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحاياننىڭ بىرلەسكەن مالىمدەمەسىندە جاريالاندى.

رەسمي ساپار اياسىندا مىناداي قۇجاتتارعا قول قويىلدى:

1. قازاقستان رەسپۋبليكاسىنىڭ ۇكىمەتى مەن بىرىككەن اراب امىرلىكتەرىنىڭ ۇكىمەتى اراسىنداعى ستراتەگيالىق ينۆەستيتسيالىق جوبالاردى قۇرۋ تۋرالى بىرلەسكەن دەكلاراتسيا؛

2. قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى مەن بىرىككەن اراب امىرلىكتەرىنىڭ باس ازاماتتىق اۆياتسيانىڭ باسقارماسى اراسىنداعى ءوزارا تۇسىنىستىك تۋرالى مەموراندۋم؛

3. قازاقستان رەسپۋبليكاسىنىڭ ەنەرگەتيكا مينيسترلىگى، «KIDF» قورى جانە «Masdar» كومپانياسى اراسىنداعى قاعيداتتار تۋرالى كەلىسىم؛

4. «KIDF» قورى مەن «Masdar» كومپانياسى اراسىنداعى ىنتىماقتاستىق تۋرالى كەلىسىم؛

5. قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى جانە «Abu Dhabi Ports» كومپانياسى اراسىنداعى ءوزارا تۇسىنىستىك تۋرالى مەموراندۋم؛

6. «قازمۇنايگاز» ۇ ق» ا ق جانە «Abu Dhabi Ports Group» كومپانياسى اراسىنداعى ستراتەگيالىق ارىپتەستىك تۋرالى كەلىسىم؛

7. قازاقستان رەسپۋبليكاسىنىڭ دەنساۋلىق ساقتاۋ مينيسترلىگى مەن بىرىككەن اراب امىرلىكتەرىنىڭ دەنساۋلىق ساقتاۋ جانە پروفيلاكتيكا مينيسترلىگى اراسىنداعى دەنساۋلىق ساقتاۋ سالاسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋم؛

8. ق ر پرەزيدەنتى جانىنداعى مەملەكەتتىك باسقارۋ اكادەمياسى مەن انۋار گارگاش اتىنداعى ديپلوماتيالىق اكادەميا اراسىنداعى ءوزارا تۇسىنىستىك تۋرالى مەموراندۋم؛

9. قازاقستان رەسپۋبليكاسى پرەزيدەنتىنىڭ ارحيۆى مەن بىرىككەن اراب امىرلىكتەرىنىڭ ۇلتتىق كىتاپحاناسى مەن ارحيۆتەرى اراسىنداعى ارحيۆ ءىسى سالاسىنداعى حالىقارالىق بايلانىستاردى جۇزەگە اسىرۋ جونىندەگى كەلىسىم.

سوڭعى جاڭالىقتار