پرەمەر- مينيستر: ەلدى مەكەندەر ماڭىنداعى جەرلەردى قايتارىپ الۋ ماڭىزدى
«جايىلىمدىق جەرمەن قامتاماسىز ەتپەيىنشە مال شارۋاشىلىعىن تولىققاندى دامىتۋ مۇمكىن ەمەس. بۇل - ەلىمىزدىڭ ازىق- تۇلىك قاۋىپسىزدىگىنە تىكەلەي قاتىسى بار اسا ماڭىزدى ماسەلە. وسىعان بايلانىستى، زاڭسىز بەرىلگەن، بوس جاتقان جەرلەردى قايتارىپ الۋ جونىندەگى ارنايى كوميسسيا بىلتىرعى ءساۋىر ايىنان بەرى جۇمىس ىستەپ كەلەدى. ناتيجەسىندە وتكەن جىلى مەملەكەت پايداسىنا 5,2 ميلليون گەكتار جەر قايتارىپ الىندى. ونىڭ ىشىندە 4,8 ميلليون گەكتارى - جايىلىمدىق جەرلەر»، - دەدى پرەمەر- مينيستر ۇكىمەتتىڭ بۇگىنگى وتىرىسىندا.
بۇل جۇمىستارعا مەملەكەت باسشىسىنىڭ اگروونەركاسىپ سالاسىنداعى ميكرو جانە شاعىن بيزنەس سۋبەكتىلەرىنە قاتىستى تەكسەرۋ جۇرگىزۋگە مۇمكىندىك بەرەتىن جارلىعى ەرەكشە سەرپىن بەرگەن.
«بۇل جۇمىس بيىل دا جالعاسادى. بيىل تاعى 5 ميلليون گەكتار جەردى قايتارىپ الۋ جوسپارلانۋدا. بۇل ورايدا ەلدى مەكەندەر ماڭىندا ورنالاسقان اۋىل شارۋاشىلىعى قۇرىلىمدارىنىڭ جەرلەرىن قايتارىپ الۋ ماڭىزدى. ولاردى قوعامدىق پايدالانۋعا نەمەسە جەكە قوسالقى شارۋاشىلىق كووپەراتيۆتەرىنە بەرۋ قاجەت. قولدانىستاعى زاڭ بۇعان مۇمكىندىك بەرەدى. سونىمەن قاتار، ەلدى مەكەندەر ماڭىندا جايىلىم جەرلەرىنىڭ از بولۋى جەكە قولداعى مال باسىنىڭ وسۋىنە شەكتەۋ قويىپ وتىر. سوندىقتان جايىلىمداردى ءتيىمدى پايدالانۋ ءۇشىن جاعداي جاساۋ قاجەت»، - دەدى ءا. سمايىلوۆ.
اۆتور
ايجان سەرىكجان قىزى
