شەتەلدىك كولىكتەردى زاڭداستىرۋ ءۇشىن قانداي قۇجاتتار كەرەك

None
استانا. قازاقپارات - ەلىمىزگە 2022 -جىلدىڭ 1-قىركۇيەگىنە دەيىن شەتەلدەن اكەلىنگەن كولىكتەردى زاڭداستىرۋ ءۇشىن قانداي قۇجاتتار كەرەك؟

ىشكى ىستەر مينيسترلىگى اكىمشىلىك پوليتسيا كوميتەتى ءتوراعاسىنىڭ مىندەتىن اتقارۋشى قايسار سۇلتانبايەۆ قاجەتتى مالىمەت ۇسىندى، دەپ حابارلايدى قازاقپارات ءتىلشىسى.

«كولىك يەسى 4 قۇجاتتى ۇسىنۋى كەرەك. ول ءوتىنىش، ءوتىنىش بەرۋشىنىڭ جەكە باسىن كۋالاندىراتىن قۇجات (جەكە باسىن سايكەستەندىرۋ ءۇشىن)، كولىك قۇرالىنىڭ پاسپورتى نەمەسە كولىك قۇرالىن تىركەۋ تۋرالى كۋالىك. سونىمەن قاتار كولىك قۇرالىنا مەنشىك قۇقىعىن راستايتىن قۇجات. ياعني مۇلىكتى ساتىپ الۋ- ساتۋ، ايىرباستاۋ، سىيعا تارتۋ نەمەسە يەلىكتەن شىعارۋ تۋرالى وزگە دە مامىلە شارتتارى، مۇراگەرلىك قۇقىعى تۋرالى كۋالىك»، - دەدى قايسار سۇلتانبايەۆ اتالعان ۆەدومستۆودا وتكەن بريفينگىدە.

اتالعان قۇجاتتاردىڭ راستىعى مامانداندىرىلعان حالىققا قىزمەت كورسەتۋ ورتالىعى ارقىلى تەكسەرىلەدى. ول جۇمىسپەن ساراپشى-كريميناليست مامان اينالىسادى.

«تەكسەرۋدەن كەيىن كولىك يەسىنىڭ ۇيالى تەلەفونىنا ناتيجەسى جانە كولىك قۇرالىن تىركەۋ ءۇشىن اۆتو حقكو- عا كەلۋ تۋرالى حابارلاما جىبەرىلەدى»، - دەيدى ول.

ەسكە سالساق، 23-قاڭتاردا شەتەلدىك كولىكتەردى زاڭداستىرۋ باستالادى. ۇكىمەت ەل اۋماعىنا 2022 -جىلعى 1-قىركۇيەككە دەيىن اكەلىنگەن كولىكتەردى تىركەۋ جانە ونىڭ يەلەرىن ارتىق مىندەتتەردەن بوساتۋدىڭ قاعيداسىن بەكىتكەن ەدى.

سوڭعى جاڭالىقتار