نۇرسۇلتان نازاربايەۆتىڭ «قۇرمەتتى سەناتور» مارتەبەسى جويىلدى

None
استانا. قازاقپارات - قازاقستاندا «قۇرمەتتى سەناتور» اتاعى ەشكىمگە بەرىلمەيدى. بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.

«3 اپتا بۇرىن رەگلامەنتتى قاراپ، سەناتتىڭ رەگلامەنتىنە ءتيىستى وزگەرىس ەنگىزىلدى. سونىڭ اياسىندا ءبىز «قۇرمەتتى سەناتور» اتاعىن رەگلامەنتتەن الىپ تاستادىق. ەندى بىزدە ونداي ينستيتۋت جوق. 2022 -جىلى وتكەن رەفەرەندۋمدا بۇكىل حالىق قولداپ، كونستيتۋتسيادان ەلباسىنا قاتىستى نورمالار الىنىپ تاستالدى. ەرتەڭ تۇڭعىش پرەزيدەنت - ەلباسى تۋرالى زاڭ كۇشىن (پارلامەنت پالاتالارىنىڭ بىرلەسكەن وتىرىسىندا) جوياتىن بولادى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە ولتىرىپ.

سونىمەن قاتار ول كونستيتۋتسيالىق سوتتىڭ ءتيىستى شەشىمى بار ەكەنىن ەسكە سالدى.

«سوندىقتان رەفەرەندۋمدى، زاڭنىڭ كۇشى جويىلاتىنىن ەسكەرىپ، ءبىز رەگلامەنتتەن «قۇرمەتتى سەناتور» دارەجەسىن الىپ تاستاعان ەدىك»، - دەدى سەنات ءتوراعاسى.

وسى ورايدا ول بۇعان دەيىن «قۇرمەتتى سەناتور» اتاعى ءبىر عانا ادامعا بەرىلگەنىن ايتتى.

«ەندى زاڭداردا «قۇرمەتتى سەناتور» دەگەن اتاق جوق. ونى بىردەن ايتايىن. كەزىندە سەنات رەگلامەنتىنە وسى وزگەرىس ەنگىزىلگەن بولاتىن. وسى رەگلامەنتتى قاراپ، وزگەرتكەندە («قۇرمەتتى سەناتور» اتاعىن - اۆتور) الىپ تاستادىق. بۇعان دەيىن ول ءبىر- اق ادامعا (نۇرسۇلتان نازاربايەۆقا - اۆتور) بەرىلدى. ەندى مۇنداي اتاق ەشكىمگە بەرىلمەيدى. ويتكەنى، قازىر بىزدە ونداي قۇقىقتىق نەگىز جوق، ونى الىپ تاستادىق»، - دەدى ماۋلەن اشىمبايەۆ.

ەسكە سالساق، 2019 -جىلى مامىر ايىندا بۇرىنعى پرەزيدەنت نۇرسۇلتان نازاربايەۆقا «قۇرمەتتى سەناتور» مارتەبەسى بەرىلگەن ەدى.

سول كەزدە «قۇرمەتتى سەناتور» اسا ماڭىزدى تالقىلاۋلارعا قاتىساتىنى ايتىلعان.

اۆتور

رۋسلان عابباسوۆ


سوڭعى جاڭالىقتار