قاراعاندىدا كوپقاباتتى ۇيدەگى ءورتتىڭ شىعۋ سەبەبى انىقتالدى

None
قاراعاندى. قازاقپارات - قاراعاندىداعى كوپقاباتتى ۇيدەگى ءورتتىڭ شىعۋ سەبەبى انىقتالدى، دەپ حابارلايدى قازاقپارات ءتىلشىسى.

«8-قاباتتاعى 3 بولمەلى پاتەردىڭ جاتىن بولمەسىندەگى اشىق وت كوزى ءورتتىڭ شىعۋىنا سەبەپ بولعان. پاتەردەن جارىلىسقا اكەلۋى مۇمكىن گاز قۇرالدارى مەن باسقا قۇرالدار تابىلعان جوق. ءورت وشاعى مارقۇم بولعان پاتەر يەسىنىڭ 43 جاستاعى ۇلى تۇرىپ جاتقان بولمەدەن شىققان»، - دەلىنگەن ت ج د حابارلاماسىندا.

ۆەدومستۆونىڭ حابارلاۋىنشا، پاتەر يەسى مەن ونىڭ جۇبايى، اعاسى تۇتىننەن ۋلانىپ كوز جۇمعان.

«ءۇش ادام تۇنشىعىپ قالعان. ولاردىڭ دەنەسىندە كۇيىك جوق. ولار شەشىنىپ، ۇيىقتاپ جاتقان بولۋى مۇمكىن. ەر ادام مەن ايەل زارداپ شەككەن تۇرعىننىڭ اتا-اناسى. قازا تاپقان ءۇشىنشى ادام اكەسىنىڭ ۇلكەن اعاسى» - دەپ ءتۇسىندىردى دەپارتامەنت.

ەسكە سالا كەتەيىك، 10-قاڭتار كۇنى قاراعاندى قالاسىندا ءۇيدىڭ 8-قاباتىنداعى پاتەردەن ءورت شىعىپ، جالىن 30 شارشى مەتر اۋماقتى شارپىدى.

1979 -جىلى تۋعان ەر ادام ورتەنىپ جاتقان پاتەردىڭ بالكونىنان قۇلاپ، مەديتسينالىق مەكەمەگە جاتقىزىلدى. ورتەنگەن پاتەردەن ءۇش ادامنىڭ دەنەسى تابىلدى.

سونداي-اق وقيعا ورنىندا گاز قۇرىلعىلارى تابىلماعان.


سوڭعى جاڭالىقتار