قازاقستاندا ەمەس، حالىقارالىق الاڭدا «جاپ-جاس قىز» دەگەن پىكىر ايتىلدى - ءزۇلفيا سۇلەيمەنوۆا سەكسيزم جايلى

None
None
استانا. قازاقپارات - ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ءوزىنىڭ وسى لاۋازىمعا تاعايىندالۋىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىراز ارىپتەستەرىم، ياعني مينيسترلەر قۇتتىقتاپ، مەنى قولداۋعا دايىن ەكەندىكتەرىن جەتكىزدى. اكىمدەر دە قولداۋ تانىتتى. وتە ريزامىن. ەيدجيزم، سەكسيزم تۋرالى ايتار بولساق، وكىنىشكە قاراي قوعامدا ايەلدەرگە قاتىستى ونداي جاعدايلار بولىپ تۇرادى. بۇل تەك قازاقستاندا عانا ەمەس، جالپى الەم ەلدەرىنە قاتىستى. مەنىڭ ويىمشا، بۇل ماسەلەگە فيلوسوفيالىق تۇرعىدان قاراۋ كەرەك. ۋايىمداماۋدىڭ قاجەتى جوق، ىسپەن دالەلدەۋ كەرەك. ماعان قاتىستى قازاقستاندا ەمەس، حالىقارالىق الاڭدا «جاپ-جاس قىز» دەگەن پىكىر ايتىلدى. ونداي پىكىرلەرگە فيلوسوفيالىق تۇرعىدان قاراپ، جۇمىس ىستەۋدى جالعاستىرا بەرۋ قاجەت. مينيستر بولىپ تاعايىندالۋىم - مەن ءۇشىن ۇلكەن جاۋاپكەرشىلىك. جاستاردىڭ ەلدىڭ دامۋىنا ۇلەسىن قوسا الاتىندىعىنىڭ دالەلى مەن كورسەتكىشى. جۇكتەلگەن مىندەتتەر مەن ءۇمىتتى اقتاۋعا تىرىسامىن.

ومىردە ۇنەمى ءبارى جاقسى، ويداعىداي بولا بەرمەيدى. حەيتەر، كورەالماۋشىلىق، نەگاتيۆ بولىپ تۇرادى. بۇل جايتقا دا فيلوسوفيالىق تۇرعىدان قاراعان ءجون. ەگەر تەرىس پىكىرلەر مەن كورەالماۋشىلاردىڭ ءار سوزىنە ءمان بەرسەك، كومىلىپ قالۋعا بولادى. مينيستر رەتىندە ماعان ارتىلعان جاۋاپكەرشىلىك جوعارى، سوندىقتان كورەالماۋشىلارعا ۋاقىت جوق»، - دەدى ءزۇلفيا سۇلەيمەنوۆا ۇكىمەت ۇيىندە تىلشىلەردىڭ ساۋالىنا جاۋاپ بەرە تۇرىپ.

سونداي-اق، جاڭا مينيستر وتاندىق ەكولوگياعا قاتىستى ماسەلەلەردى شەشۋ جۇمىسى جالعاساتىنىن ايتتى.

«بىلتىر ەكولوگيا ۆيتسە-ءمينيسترى بولعاندا ءبىراز جۇمىس ىستەدىك دەپ ويلايمىن. جۋىردا ب ا ق وكىلدەرىمەن، جالپى قوعام وكىلدەرىمەن تاعى جولىعامىز دەگەن ويدامىن. ەكولوگيا تاقىرىبىنا كەلسەك، ماسەلە جينالىپ قالعان، كەشەندى ءارى كۇردەلى. ولاردى بىرەر جىلدىڭ ىشىندە شەشۋ مۇمكىن ەمەس. دەگەنمەن، ەكولوگيالىق ماسەلەلەردى شەشۋ باعىتىنداعى جۇمىس جالعاسا بەرەدى»، - دەيدى ول.

ەسكە سالساق، 4- قاڭتاردا ءزۇلفيا سۇلەيمەنوۆا ق ر ەكولوگيا جانە تابيعي رەسۋرستار ءمينيسترى لاۋازىمىنا تاعايىندالدى.

بۇعان دەيىن مادەنيەت جانە سپورت ءمينيسترى اسحات ورالوۆ بوتتارمەن جۇمىس ىستەۋگە قاتىستى پىكىر بىلدىرگەن ەدى.

سوڭعى جاڭالىقتار