بۇلىكشىلەردى جيناۋ قالاي ۇيىمداستىرىلدى - باس پروكۋراتۋرا

استانا. قازاقپارات - باس پروكۋراتۋرا «قاڭتار وقيعاسى: دەرەك پەن دايەك» دەرەكتى فيلمىندە بۇلىكشىلەردىڭ قالاي جينالعانى جانە ولاردىڭ ءجۇرۋ باعىتى قالاي ۇيىمداستىرىلعانىن جاريالادى، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، بۇلىكتى ۇيىمداستىرۋشىلار ناقتى جوسپارعا ساي ارەكەت ەتكەن. ماسەلەن، الماتى قالاسىندا جينالاتىن ەكى ورىن بەلگىلەنگەن. ونىڭ ءبىرى قالانىڭ باتىسىنداعى - «الماتى ارەنا» سپورت كەشىنىنىڭ ماڭى، ەكىنشىسى - شاھاردىڭ شىعىسىنداعى «حالىق ارەنا» كەشەنىنىڭ الاڭى. ەكى جەردە دە جينالاتىن ۋاقىت بىردەي - كەشكى ساعات 18:00-20:00 ارالىعى.

«بۇل اقپاراتتاردى حالىققا «Whatsapp» جانە «Telegram» مەسسەندجەرلەرى ارقىلى جەتكىزگەن. الماتىدا ساناۋلى ساعاتتاردىڭ ىشىندە ءبىر مەسسەندجەردىڭ قاتىسۋشىلار سانى 140 تان 5,5 مىڭعا دەيىن ارتقانى انىقتالدى. ەكى توپ تا ءبىر مەزەتتە، ياعني كەشكى ساعات 21:00 دە ءبىر باعىتقا قاراي قوزعالا باستايدى. ولار اكىمدىك عيماراتىنا بەتتەيدى. اباي، تولە بي سياقتى كوشەلەرمەن ءجۇرىپ، جول بويى جولىققانداردى قاتارعا قوسىپ وتىرادى. رەسپۋبليكا الاڭىنا جەتكەنشە، ادام سانى 10 مىڭعا جۋىقتايدى. تاياق، ارماتۋرا، دۋبينكا، بالتا سياقتى قۇرالدارمەن، جانعىش، جارىلعىش زاتتارمەن قارۋلانعان بۇلىكشىلەر پوليتسيا قىزمەتكەرلەرى مەن اسكەريلەرگە قارسى سوققى بەرەدى. ءبىر ادامعا بىرنەشەۋى جابىلا كەتەدى»، - دەلىنگەن دەرەكتى فيلمدە.

سونىمەن قاتار، باس پروكۋراتۋرا الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆتىڭ جۇمىس ورنىن تاستاپ كەتىپ بارا جاتقان ۆيدەوسىن جاريالادى.