قاڭتار وقيعاسى: بۇرىنعى قورعانىس ءمينيسترى مۇرات بەكتانوۆ زاڭسىز بۇيرىق بەرگەن

None
استانا. قازاقپارات - اسكەري سوتتا قورعانىس ەكس-ءمينيسترى بەكتانوۆتىڭ ءىسى بويىنشا تىڭداۋ ءجۇرىپ جاتىر.

بۇل تۋرالى پارلامەنت ءماجىلىسىنىڭ جالپى وتىرىسىندا ق ر باس پروكۋرورى بەرىك اسىلوۆ ءمالىم ەتتى، دەپ حابارلايدى قازاقپارات ءتىلشىسى.

«ودان بولەك، اسكەري سوتتا قورعانىس ەكس-ءمينيسترى بەكتانوۆتىڭ ءىسى بويىنشا تىڭداۋ جالعاسۋدا. تەرگەۋگە سايكەس، ول توتەنشە جاعداي كەزەڭىندە زاڭسىز بۇيرىق بەرگەن جانە ستراتەگيالىق نىسانداردى اسكەريلەردىڭ كۇزەتىنسىز قالدىرعان. بۇرىنعى قورعانىس ءمينيسترى ەلىمىزدە كونستيتۋتسيالىق ءتارتىپ ورناتۋ جونىندە شارالار قابىلداماعان»، - دەدى ب. اسىلوۆ.

سونداي-اق، ول سوت مۇرات بەكتانوۆتىڭ ءىس-ارەكەتتەرىنە تۇپكىلىكتى باعا بەرەتىنىن جانە ونىڭ جازاسىن انىقتايتىنىن اتاپ ءوتتى.

«تارتىپسىزدىككە قاتىسقاندار، اسىرەسە، الماتىدا سانى جاعىنان باسىم بولعان. ولار قورشاۋدى بۇزعان، پوليتسيا مەن ۇلتتىق ۇلان كۇشتەرىن باسىپ، حالىققا زورلىق-زومبىلىق جاساعان. سونىڭ سالدارىنان قىلمىسكەرلەر قولىنان ادامدار قازا بولعان، قالالار تونالعان جانە ورتەلگەن. سوندىقتان بەكتانوۆ ۇرىس جاعدايىندا جاسالعان بيلىكتى اسىرا پايدالانۋ بويىنشا ايىپتالىپ وتىر (ق ك-نىڭ 451-بابىنىڭ 3-بولىگى). سوت ونىڭ ءىس-ارەكەتتەرىنە تۇپكىلىكتى باعا بەرەدى جانە ونىڭ جازاسىن انىقتايدى»، - دەدى باس پروكۋرور.

بىلتىر، 21-اقپاندا بۇرىنعى قورعانىس ءمينيسترى مۇرات بەكتانوۆ ۇستالدى جانە ۋاقىتشا ۇستاۋ يزولياتورىنا قامالدى.

«2022 -جىلعى 19-اقپاندا باس پروكۋراتۋرا بۇرىنعى قورعانىس ءمينيسترى مۇرات كارىباي ۇلى بەكتانوۆقا قاتىستى قازاقستان رەسپۋبليكاسى قىلمىستىق كودەكسىنىڭ 452-بابى ارەكەتسىزدىك فاكتىسى بويىنشا سوتقا دەيىنگى تەرگەپ-تەكسەرۋدى باستادى»، - دەپ جازىلعان ق ر باس پروكۋراتۋراسىنىڭ حابارلاماسىندا.

سوڭعى جاڭالىقتار