جەلىدەگى جالعان اقپاراتقا سەنىپ جولعا شىققان تۇرعىندار قار قۇرساۋىندا قالىپ جاتىر

تۇركىستان. قازاقپارات - جەلىدە تاراعان اقپاراتتارعا سەنگەن تۇرعىندار قار قۇرساۋىندا قالىپ جاتىر.

بۇل تۋرالى تۇركىستان وبلىسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى رولان يبراگيموۆ مالىمدەدى، دەپ حابارلايدى قازاقپارات ءتىلشىسى.

بۇگىنگى كۇنى تۇركىستان وبلىسىندا جاۋعان قالىڭ قار مەن قاتتى جەلدىڭ زارداپتارىن جويۋ جۇمىسى ءجۇرىپ جاتىر.

توتەنشە جاعدايلار دەپارتامەنتى تاراپىنان رەسپۋبليكالىق، وبلىستىق جولداردى قاردان تازارتۋ ءۇشىن جالپى 133 ادام، 74 تەحنيكا، ال جەرگىلىكتى ماڭىزى بار اۆتوموبيل جولدارىن قاردان تازارتۋ ءۇشىن جالپى 97 ادام، 41 تەحنيكا كومەككە جىبەرىلگەن.

«تۇرعىندار رەسمي ب ا ق-تا تاراعان اقپاراتقا ەمەس، تاكسيستەردىڭ جەلىدە ايتقان سوزدەرىنە سەنىپ ءوز ءومىرىن قاتەرگە تىگىپ جاتىر. كەشەگى كۇنى دە «جامبىل وبلىسىنا كوپ ماشينالاردى وتكىزىپ جاتىر ەكەن» دەپ قانشاما ادامدار جولعا شىعىپ كەتكەن. 4-قاڭتارداعى مالىمەت بويىنشا قاتتى جاۋعان قاردىڭ جانە بۇرقاسىن جەل مەن بوران سالدارىنان 8 وبلىستىق ماڭىزى بار جول ۋاقىتشا جابىلعان. قار قۇرساۋىنان 103 كولىك، 110 ادام شىعارىلدى»، - دەدى باسقارما باسشىسى.

سونداي-اق، رولان يبراگيموۆ اۋا رايىنا بايلانىستى حابارلاما كەلگەن جاعدايدا تۇرعىنداردىڭ ۇزاق جولعا شىقپاۋىن جانە تەك رەسمي اقپاراتقا سەنۋ كەرەكتىگىن جەتكىزدى.