قانداي ەلدەر قىتايدان كەلەتىن تۋريستەرگە شەكتەۋلەر ەنگىزۋدە
قىتايدان كەلەتىن جولاۋشىلارعا Covid-19 تەستىە مىندەتتەپ، باسقا دا ەرەجەلەردى قاتاڭداتقان ەلدەرگە قىسقاشا شولۋ ۇسىنامىز:
امەريكا قۇراما شتاتتارى
5-قاڭتاردان باستاپ ا ق ش قىتايدان كەلەتىن بارلىق جولاۋشىدان Covid-كە تەستتەن ءوتۋدى تالاپ ەتەدى، تەستتىڭ تەرىس ناتيجەسى ەكى كۇنگە عانا جارامدى. ول بولماسا سوڭعى 90 كۇندە كوروناۆيرۋستان جازىلىپ شىقتى دەگەن انىقتاما ۇسىنۋى قاجەت.
ا ق ش اۋرۋلاردى باقىلاۋ ورتالىعىنىڭ مالىمەتى بويىنشا، بۇل تەستىگە پ ت ر تەستىلەۋ نەمەسە انتيگەنگە ءوزىن تەكسەرۋ كىرەدى.
گونكونگ پەن ماكاودان كەلەتىندەرگە دە وسى تالاپتار قويىلادى.
ەۋروپالىق وداق
5-قاڭتاردان باستاپ فرانسياعا قىتايدان كەلەتىن بارلىق جولاۋشىلار ۇشۋدىڭ الدىندا 48 ساعاتتان اسپايتىن ۋاقىتتا جاسالعان پ ت ر تەست نەمەسە انتيگەنگە ەكسپرەسس-تەستىنىڭ تەرىس ناتيجەسىن كورسەتۋى كەرەك.
يتاليا مەن يسپانيا دا Covid تەستىلەۋى كەرەك دەگەن تالاپ قويىپ وتىر.
ەۆروپا ەلدەرى وسى اپتادا جيىن وتكىزىپ، وسى ماسەلەنى تالقىلاماقشى. ال بيىلدان ەۋرووداق ءتوراعاسى بولعان شۆەتسيا ە و-عا كىرۋگە شەكتەۋ قويۋ ماسەلەسىندە بۇكىل وداققا ورتاق ساياسات قاراستىرىلىپ جاتقانىن مالىمدەدى.
اۆستراليا
اۆستراليا دا قىتايدان، سونىڭ ىشىندە گونكونگ مەن ماكاودان دا كەلەتىندەرگە Covid-19 تەرىس تەست ناتيجەسىن تالاپ ەتەدى. ولار مۇنى بەيجىڭنەن كوروناۆيرۋستىڭ ءورشۋى جايلى ناقتى اقپاراتتىڭ بولماۋىمەن ءتۇسىندىرىپ وتىر.
كانادا
كانادا قىتايدان كەلەتىن بارلىق جولاۋشىدان سوڭعى ەكى كۇندە Covid-كە تەستتەن ءوتۋدى تالاپ ەتەدى.
بىرىككەن كورولدىك
5-قاڭتاردا كۇشىنە ەنەتىن ەرەجەلەرگە سايكەس، ۇلى بريتانياعا قىتايدان كەلەتىن بارلىق جولاۋشىلار ەلگە قونباي تۇرىپ تەستتەن ءوتۋى ءتيىس.
ۇلىبريتانيا ۇكىمەتى سونىمەن بىرگە جاڭا شتامداردى انىقتاپ وتىرۋ ءۇشىن كەلۋشىلەردىڭ كەيبىرىن قوسىمشا تەكسەرەتىنىن مالىمدەدى.
يزرايل
يزرايل قىتايدان كەلەتىن شەتەلدىكتەردەن Covid تەستىنەن ءوتۋدى تالاپ ەتەدى. اۋەجايلاردا ءوز ەركىمەن تەكسەرىلگىسى كەلەتىندەرگە ارناپ سكرينينگ ورتالىعى اشىلدى.
جاپونيا
جاپونيا قىتايدان كەلەتىندەرگە جاڭا شەكتەۋلەر ەنگىزگەن العاشقى ەلدەردىڭ ءبىرى بولدى. جاپون ەلىنە دە كىرۋ ءۇشىن كوروناۆيرۋسقا تەستىڭ تەرىس ناتيجەسىن كورسەتۋ كەرەك.
كوۆيد انىقتالعاندار ارنايى مەكەمەلەردە جەتى كۇنگە كارانتينگە جاتقىزىلادى. بۇنىمەن قوسا توكيو قۇرلىقتىق قىتايمەن اراداعى رەيستەر سانىن ازايتپاق.
وڭتۇستىك كورەيا
وڭتۇستىك كورەيا دا قىتايدان كەلەتىندەردى ءجىتى تەكسەرىپ، ەلگە كىرەردىڭ الدىندا جانە كەلگەن كەزدە تاعى دا Covid تەرىس تەست ناتيجەسىن تالاپ ەتەدى. ال گونكونگ پەن ماكاودان كەلەتىندەرگە بۇل ەرەجە قاتىستى ەمەس.
ءۇندىستان
ءۇندىستان دا قىتايدان جانە ازيانىڭ ءبىرقاتار وزگە ەلدەرىنەن كەلگەندەرگە Covid تەستىن تالاپ ەتەدى، تەرىس ناتيجە ەلگە كىرمەس بۇرىن 72 ساعات ىشىندە الىنعان بولۋى قاجەت.
ماروككو
افريكانىڭ سولتۇستىگىندە ورنالاسقان ماروككو ەلى ەڭ قاتال شاراعا بارىپ وتىر. ولار قىتايدان كەلەتىن جولاۋشىلارعا ەلگە كىرۋگە تىيىم سالدى. ول تىيىم 3-قاڭتاردا كۇشىنە ەنىپ، ودان ءارى حابارلاما تۇسكەنشە ساقتالادى. ەلدىڭ س ءى م حابارلاۋىنشا، بۇل قادام «ماروككودا جاڭا تولقىن جانە ونىڭ سالدارى بولماس ءۇشىن جاسالىپ وتىر».
2022 -جىلعى جەلتوقساندا قازاقستاندا كوروناۆيرۋسپەن اۋىرۋ كورسەتكىشى وتكەن ايمەن سالىستىرعاندا 2,4 ەسە ءوستى. ق ر دەنساۋلىق ساقتاۋ ۆيتسە-ءمينيسترى ايجان ەسماعامبەتوۆانىڭ ايتۋىنشا، «سەربەر» شتامى الەمنىڭ 65 استام ەلىندە انىقتالعان جانە بۇرىنعى «وميكروننان» ەش ايىرماشىلىعى جوق. ول اۋرۋ جەڭىل تۇردەگى تۇماۋ سەكىلدى وتەتىنىن اتاپ ءوتتى.
اۆتورى: ارسەن وتەشەۆ
