اسحات ايماعامبەتوۆ قانداي قازاقستاندىق اۆتورلاردىڭ كىتابىن وقۋعا كەڭەس بەرەدى

استانا. قازاقپارات - وقۋ- اعارتۋ ءمينيسترى اسحات ايماعامبەتوۆ قازاق تىلىندەگى كىتاپ ساتىلىمىنىڭ ارتقانىن ايتىپ، اتا-انالار مەن وقۋشىلارعا قازاقستاندىق ءبىرقاتار اۆتوردىڭ شىعارمالارىن وقۋعا كەڭەس بەردى، دەپ حابارلايدى قازاقپارات.

مينيستر 2020 -جىلى «وقۋعا قۇشتار مەكتەپ» اۋقىمدى رەسپۋبليكالىق جوباسى ىسكە قوسىلعانىن ەسكە ساالدى. ونىڭ ماقساتى - بالالاردى كوركەم ادەبيەت وقۋعا باۋلۋ.

«جوبانى ىسكە قوسقانعا دەيىن جۇرگىزگەن تالداۋ مەكتەپ كىتاپحانالارىندا، اسىرەسە قازاق تىلىندە زاماناۋي كوركەم ادەبيەتتىڭ جوق ەكەنىن كورسەتتى. وسىعان بايلانىستى ادەبيەتتىڭ ەڭ الدىمەن، قازاق تىلىندە قولجەتىمدى بولۋىن جانە عىلىمي فانتاستيكا جانرى مەن الەم ادەبيەتىنىڭ ۇزدىك شىعارمالارىنىڭ باسىلىمدار تىزىمىنە ەنگىزىلۋىن باستى نازاردا ۇستادىق.

مەكتەپتەردى كىتاپپەن قامتاماسىز ەتۋ، كىتاپحاناشىلاردىڭ جۇمىسىن قايتا قاراۋ، جۇمىس ىستەپ تۇرعان مەكتەپ كىتاپحانالارى مەن كوۆوركينگ ورتالىقتارىن جوندەۋ جانە جاڭادان اشۋ، سونداي-اق بالالار اراسىندا جارىستار وتكىزۋ، كىتاپ وقۋعا 20 مينۋت ۋاقىت ءبولۋ جانە باسقا دا ءىس-شارالار ۇيىمداستىرىلدى»، - دەپ جازادى ۆەدومستۆو باسشىسى.

ا. ايماعامبەتوۆتىڭ ايتۋىنشا، ەكى جىلدا مەكتەپ كىتاپحانالارىنا 4 ميلليونعا جۋىق ادەبيەت ساتىپ الىندى. الايدا، جوبا بارلىق وڭىردە بىردەي ساپالى جۇزەگە اسىرىلىپ جاتقان جوق.

سونداي-اق ءمينيستردىڭ سوزىنشە، مەكتەپتەردەگى دەمالىس ايماقتارىندا كىتاپحانالار ۇيىمداستىرۋ جوسپاردا بار. وسىعان بايلانىستى كەستە بويىنشا اشىلىپ، كىلتكە جابىق تۇراتىن ءداستۇرلى مەكتەپ كىتاپحانالارىنان بولەك، كىتاپ وقۋعا، ءتىپتى ءۇي تاپسىرماسىن ورىنداۋعا ىڭعايلى بولاتىن ايماق قۇرۋ كوزدەلىپ وتىر.

«قازىردىڭ وزىندە «وقۋعا قۇشتار مەكتەپ» جوباسىنىڭ وڭ اسەرىن كورىپ وتىرمىز. سۇرانىستىڭ ارقاسىندا ۇسىنىس پايدا بولىپ، ول نارىقتىڭ دامۋىنا اسەر ەتتى. سوڭعى جىلدا مەملەكەتتىك تىلدەگى اۋدارما ادەبيەتتەر سانى ەسەلەي ارتتى. كىتاپ وقۋعا دەگەن قىزىعۋشىلىقتىڭ ارتۋى قازاق تىلىندەگى كىتاپتاردىڭ ساتىلىمىنا دا اسەر ەتىپ وتىر، بيىل ايتارلىقتاي ءوسىم تىركەلدى.

ءتىپتى وقىرمان رەتىندە قازاق تىلىنە جوعارى ساپالى اۋدارىلعان بەستسەللەرلەردى ءجيى كەزدەستىرەمىن. مىسالى، قازاق تىلىندە وقىعان كىتاپتارىمىزدىڭ ءبىرى - «حارري پوتتەر» مەن «عاجايىپ» اۋدارمالارى.

ساپالى باسىلىمدار مەن قازاقستاندىق اۆتورلاردىڭ كوبەيىپ كەلە جاتقانى دا قۋانتادى. مىسالى، جاقىندا وقىعان قازاقستاندىق اۆتورلاردىڭ ءتورت باسىلىمى ۇنادى (ونىڭ ىشىندە بالالاردىڭ):

1. اقيقات راس «شكولاتا»

2. رۇستەم ساۋىتباي «شوكو الەم»

3. زيرا ناۋرىزبايەۆا «التىن توستاعاندى ىزدەۋ. باتۋ مەن ونىڭ دوستارىنىڭ باستان كەشكەندەرى»

4. «ەركەتاي» كوميكستەرى.

كىشكەنتاي بالالارىمىزعا كىتاپتى داۋىستاپ وقىپ بەرۋگە، ولاردى قولداپ، كىتاپ وقۋعا باۋلۋعا، ونى ساتىپ الىپ بەرۋگە، كىتاپ كورمەلەرىنە بىرگە بارۋعا شاقىرامىن.

ارينە، بالالارعا ءوزىمىز ۇلگى بولىپ، وقۋدىڭ ماڭىزدى ەكەنىن كورسەتە ءبىلۋىمىز ماڭىزدى»، - دەيدى وقۋ-اعارتۋ ءمينيسترى.