قازاقستاندىق وقۋشىلار «بەستىك» باعا الىپ، اقشا تاۋىپ وتىر
پلاتفورمانى قۇراستىرۋشىلاردىڭ دەرەگىنشە، Kundelik Bonus - بۇل ەل وقۋشىلارىنىڭ قارجى ساۋاتتىلىعى مەن وقۋ ۇلگەرىمىن جاقسارتۋ ماقساتىندا ازىرلەنگەن الەۋمەتتىك جوبا. ول ارقىلى بالالاردىڭ ساباقتا العان بەستىك باعالارى بونۋس رەتىندە ەسەپتەلىپ، كەيىن ونى kundelik.kz كومپانياسىنىڭ سەرىكتەس دۇكەندەرىنەن زات ساتىپ العاندا قولدانۋعا بولادى.
«K. Bonus» باعدارلاماسىنا تەك 10- جانە 11-سىنىپ وقۋشىلارى قاتىسا الادى:
- ءار 9 جانە 10 بالدىق ءفورماتيۆتى باعا ءۇشىن وقۋشى +100 K. Bonus الادى.
- توقساندى 5 كە اياقتاعان بالاعا ءار ءپان بويىنشا تاعى دا 500+ K. Bonus بەرىلەدى.
«بۇل جەردە مىنانى ەسكەرۋ كەرەك: وقۋشىلارعا K. Bonus جانە S. Bonus بەرىلەدى. ناقتىراق ايتساق، K. Bonus - بۇل kundelik.kz ەلەكتروندىق جۋرنالدا ساباق ۇلگەرىمىنە بايلانىستى العان باعا ءۇشىن بەرىلەتىن بونۋستار. S. Bonus - بۇل سەرىكتەس Sulpak كومپانياسىنىڭ بونۋستارى. ول ارقىلى وقۋشىلار اتالعان دۇكەننەن زات ساتىپ الۋ كەزىندە تاۋار قۇنىنىڭ 50 پايىزىن تولەي الادى. ول ءۇشىن ءسىز اۋەلى kundelik.kz-تە K. Bonus-تار جينايسىز. كەيىن ونى جوعارىدا كورسەتىلگەن دۇكەننەن زات الۋ ءۇشىن S. Bonus-قا اينالدىراسىز»، - دەپ ءتۇسىندىردى «Kundelik.kz» ج ش س ماركەتينگ مەنەدجەرى ميحايل لاۆرەنوۆ.
ونىڭ سوزىنشە، وقۋشى S. Bonus-تى 30 كۇن ىشىندە قولدانىپ ۇلگەرۋى ءتيىس. سونىمەن قاتار باعدارلامانىڭ ارنايى تالابى بار. ماسەلەن، بالا ءبىر توقساندا تەك 10 مىڭنان اسپايتىن بونۋستى ايىرباستاي الادى. ودان جوعارى سوماعا رۇقسات ەتىلمەيدى.
مۇنداي جوبىنىڭ بار ەكەنىن استانا قالاسىنداعى 64№ مەكتەپ- ليتسەيدىڭ 11-سىنىپ وقۋشىسى نازەركە جۇمابەك جۋىردا Tik-Tok جەلىسى ارقىلى بىلگەن. ول ءبىرىنشى توقسانداعى بەستىك باعالارى ءۇشىن 10 مىڭ بونۋس الىپ، ونى كundelik.kz سايتىندا 10 مىڭ تەڭگەگە كونۆەرتاتسيالاعان. ءسويتىپ، تەحنيكا ساتاتىن دۇكەننەن سىمسىز قۇلاققاپ ساتىپ العان. ال ونىڭ 50 پايىز قۇنىن مەكتەپتە ءبىلىم الۋمەن تاپقان بونۋسپەن تولەگەن.
ەكىنشى توقساننىڭ سوڭى جاڭا جىل مەرەكەسىنە تۇسپا-تۇس كەلگەندىكتەن، وقۋشى قىز بۇل جولعى بونۋسىن اتا- اناسىنا سىيلىق الۋعا جۇمساماق بولىپ شەشىپتى. ەكىنشى توقساندا جيناعان 9 مىڭ ۇپايى 9 مىڭ تەڭگەگە تەڭ. وسىلايشا، ول جاڭا جىل مەرەكەسىندە اتا-اناسىن قۋانتقان.
«بۇل جوبا وقۋعا دەگەن تالپىنىسىمدى ارتتىرىپ، موتيۆاتسيا بەردى. وقۋ ۇلگەرىمىمدى ءبىر قالىپتا ساقتاپ كەلەمىن. ۇزدىك وقۋشىمىن. اقشا جۇمساۋ جوسپارىن قۇرىپ، تەحنيكا دۇكەنىنىڭ جەڭىلدىك اكسيالارىن باقىلاپ وتىرامىن. وزىمە ءتيىمدى شارتتار بولعان كەزدە تاۋار ساتىپ الامىن»، - دەيدى نازەركە جۇمابەك.
قانشا K. Bonus جيناعانىڭىزدى قالاي بىلۋگە بولادى؟
باعدارلاما اياسىندا جينالعان بونۋستاردى تەكسەرۋ ءۇشىن باعدارلامانىڭ ۆەب-سايتىنا تىركەلۋ قاجەت. ول ءۇشىن https://bonus.kundelik.kz/kz سايتىنا كىرىپ، تىركەلۋ بولىمىنە وتەسىز. كەيىن ەكراننىڭ وڭ جاق جوعارعى بۇرىشىندا «كىرۋ» باتىرماسى شىعادى. وعان ءوتىپ، جەكە مالىمەتتەرىڭىزدى ەنگىزىڭىز. بۇل ورايدا، پلاتفورمانى قۇراستىرۋشىلار ۇيالى تەلەفون ءنومىرىن تەرگەن كەزدە مۇقيات بولۋدى ەسكەرتەدى. ەگەر ول قاتە كورسەتىلگەن بولسا، وندا قولداۋ قىزمەتىنە حابارلاسىپ، باسقا ءنومىردى ەنگىزۋگە بولادى. بارلىق قاجەتتى جولدار تولتىرىلعاننان كەيىن «ساقتاۋ» باتىرماسىن باساسىز. ارتىنشا، «مەنىڭ بەلسەندى بالانسىم» بلوگىندا جيناعان K. Bonus-تار سانىن كورۋگە بولادى.
ال K. Bonus-تى زات ساتىپ الۋ ماقساتىندا S. Bonus-قا قالاي اۋىستىرۋعا بولادى؟
K. Bonus-تى زات ساتىپ الۋ ءۇشىن مىندەتتى تۇردە S. Bonus-قا ايىرباستاۋ قاجەت. ول ءۇشىن سايتتىڭ تومەنگى جاعىندا ورنالاسقان «بونۋستاردى ايىرباستاۋ» باتىرماسىن باسۋ كەرەك. وسىدان كەيىن تەحنيكا ساتاتىن دۇكەن سايتىنىڭ بەتى اشىلادى. وندا وقۋشى K. Bonus-قا تىركەلگەن تەلەفون ءنومىرىن كورسەتىپ، راستاۋ كودىن ەنگىزۋى ءتيىس. وسى ساتتە ءسىز دۇكەننەن حابارلاما كۇيىندە كەلەتىن كودتى تەرۋىڭىز قاجەت. ءارى قاراي قانشا K. Bonus-تى S. Bonus-قا ايىرباستاۋعا دايىن ەكەنىڭىز سۇرالادى. ونىڭ مولشەرىن انىقتاعاننان كەيىن، وقۋشىلار ولاردى ەلىمىزدەگى تۇرمىستىق جانە ەلەكتروندىق تەحنيكا دۇكەندەرىنىڭ بىرىنەن تاۋارلار ساتىپ الۋ كەزىندە جۇمساي الادى.
«2023-جىلى ءبىز بۇل باعدارلاماعا قاتىساتىن سەرىكتەس دۇكەندەردىڭ سانىن ۇلعايتۋدى جوسپارلاپ وتىرمىز. سونىمەن قاتار، ۇپايلاردى بونۋسقا اينالدىرۋ باستاماسىن كەزەڭ-كەزەڭىمەن 7، 8 جانە 9-سىنىپ وقۋشىلارى ءۇشىن دە قولجەتىمدى ەتەمىز»، - دەپ ءمالىم ەتتى «Kundelik.kz» ج ش س ماركەتينگ مەنەدجەرى ميحايل لاۆرەنوۆ.
Kundelik Bonus-تىڭ جارامدىلىق مەرزىمى
قۇراستىرۋشىلاردىڭ تالابىنا ساي، K. Bonus-تى قولدانۋ مەرزىمدەرى بەلگىلەنگەن. اتاپ ايتقاندا 1-توقساندا (01.09.22 - 06.11.22) الىنعان بونۋستار 20 قاراشاعا دەيىن جارامدى. ال 2-توقساندا (07.11.22 - 08.01.23) جيناقتالعان بونۋستاردى وقۋشىلار 15- قاڭتارعا دەيىن قولدانۋى ءتيىس. 3-توقساندا (09.01.23 - 26.03.23) قانداي دا ءبىر مولشەردە بونۋس الساڭىز ونى 1- ساۋىرگە دەيىن پايدالانۋىڭىز قاجەت. 4-توقساندا (27.03.23 - 15.06.23) جيناقتاعان ۇپايلارعا زات ساتىپ الۋ 15- ماۋسىمدا اياقتالادى.
