ق ر پرەزيدەنتى قانداستاردى مەملەكەتتىك ناگرادامەن ماراپاتتادى

استانا. قازاقپارات - رەسەيلىك ءبىرقاتار قانداسىمىز مەملەكەتتىك ماراپاتقا يە بولدى.

بۇل تۋرالى «وتانداستار قورى» كوممەرتسيالىق ەمەس اكسيونەرلىك قوعامىنان ءمالىم ەتتى، دەپ حابارلايدى قازاقپارات.

ق ر پرەزيدەنتى قاسىم-جومارت توقايەۆتىڭ شەشىمىمەن مەملەكەتتىك جانە قوعامدىق قىزمەتتە سىڭىرگەن ەڭبەگى مەن حالىقتار اراسىنداعى دوستىقتى نىعايتۋعا قوسقان ەلەۋلى ۇلەسى ءۇشىن «شاپاعات» مەدالىمەن ماراپاتتالدى:

- رەسەي فەدەراتسياسى كراسنويارسك قالاسىنىڭ «اق جايىق» جەرگىلىكتى قازاق ۇلتتىق-مادەني اۆتونومياسى قوعامدىق ۇيىمى ءتوراعاسىنىڭ ورىنباسارى گۇلنار عاريف قىزى؛

- «ومبى قازاقتارى» قوعامدىق ۇيىمىنىڭ نەگىزىن قالاۋشى، «ومبى قازاقتارى» وڭىرلىك مادەني-اعارتۋ گازەتىنىڭ باس رەداكتورى، رەسەي جۋرناليستەر وداعىنىڭ مۇشەسى تورعىن مۇحامەديار قىزى ماراپاتتالدى.

30 -جەلتوقساندا قازاقستاننىڭ ماسكەۋدە ورنالاسقان ەلشىلىك عيماراتىندا ماراپاتتى ەلىمىزدىڭ رەسەيدەگى ەلشىسى ەرمەك كوشەربايەۆ تابىستادى.

قور مالىمەتىنە سۇيەنسەك، گۇلنار گاريف قىزى 2012-جىلدان باستاپ كراسنويارسك ولكەسىنىڭ اۋماعىندا قازاق مادەنيەتىن ساقتاۋعا جانە ناسيحاتتاۋعا باعا جەتپەس ۇلەس قوسىپ كەلەدى.

تورعىن مۇحامەديار قىزى 2008-جىلى «ومبى قازاقتارى» قوعامدىق ۇيىمىن قۇردى. ۇلتتىق قۇندىلىقتارىمىزدى ساقتاپ، دارىپتەۋگە، اسىرەسە جاستار اراسىندا ءداستۇرلى قۇندىلىقتاردى، ءتىل مەن مادەنيەتتى دامىتۋعا كوپتەگەن ماڭىزدى جوبالاردى جۇزەگە اسىرۋدا. ۇيىمنىڭ ەڭ تانىمال جوبالارى: جالپىقالالىق ناۋرىز، «ارۋ قىز» - تالانت جانە سۇلۋلىق بايقاۋى، «دوستىق ليگاسى» جاستار بۇكىلرەسەيلىك ۇلتارالىق فورۋمى، قازاق جاستارىنىڭ «العا» فورۋمى جانە تاعى باسقا.