كريشتيانۋ رونالدۋ «ال-ناسر» كلۋبىمەن كەلىسىمشارتقا وتىردى
اقپاراتقا سايكەس، 37 جاستاعى فورۆاردپەن كەلىسىم ەكى جىلعا جاسالعان.
ب ا ق- تاردىڭ مالىمەتىنشە، رونالدۋ جارنامالىق كەلىسىمدەردى قوسا ەسەپتەگەندە جىلىنا 200 ميلليون ەۋرو جالاقى الاتىن بولادى.
«ال-ناسر» كلۋبىنىڭ جۇمىسى اسا شابىتتاندىرادى جانە جوعارى جەتىستىكتەرگە جەتۋ ءۇشىن كوماندالاس دوستارىمنىڭ قاتارىنا قوسىلۋعا قۋانىشتىمىن»، - دەدى ايگىلى فۋتبولشى.
اتالعان كلۋبتىڭ ديرەكتورلار كەڭەسىنىڭ ءتوراعاسى مۋسالي ال مۋامماردىڭ ايتۋىنشا، بۇل كەلىسىم جاي عانا تاريحي بەتتى باستاۋ ەمەس، ودان دا ايتۋلى وقيعا.
«ال-ناسر» ساۋد ارابياسىنىڭ سەگىز مارتە چەمپيونى (سوڭعى تيتۋلدى 2019-جىلى يەلەندى) اتانعان كلۋب.
رونالدۋ جۋرناليست پيرس مورگانعا سۇحبات بەرگەننەن كەيىن داۋ تۋىنداپ، «مانچەستەر يۋنايتەد» قاراشا ايىندا ونىمەن كەلىسىمشارتتى ۇزگەن ەدى. وسىدان كەيىن كريشتيانۋ قاتاردا وتكەن 2022-جىلعى الەم چەمپيوناتىنا اتتاندى. الايدا ول ءساتسىز ويىن كورسەتتى: پورتۋگاليالىق فۋتبولشى بەس ويىندا تەك ءبىر گول عانا سوقتى، ونىڭ وزىندە ەكى ويىندى قوسالقى قۇرام ورىندىعىندا وتكىزىپ شىقتى. جالپى پورتۋگاليا قۇراماسى ءتۋرنيردىڭ شيرەك فينالىندا ماروككو قۇراماسىنا 0:1 ەسەبىمەن جەڭىلىپ قالدى.
ەسكە سالايىق، بۇعان دەيىن ك. رونالدۋ پورتۋگاليا قۇراماسىندا ويناي بەرۋگە نيەتتى ەكەندىگىن بىلدىرگەن بولاتىن.
