الەم چەمپيوناتىنىڭ «كۇمىسى» لايىقتى ناتيجە - دينارا ءسادۋاقاسوۆا

الماتى. قازاقپارات - قازاقستاندىق شاحماتشى، الماتىدا راپيد بويىنشا ايەلدەر اراسىنداعى الەم چەمپيوناتىنىڭ كۇمىس جۇلدەگەرى دينارا ءسادۋاقاسوۆا ءوزىنىڭ جەڭىسى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«تۋرنيردىڭ ۆيتسە-چەمپيونى اتانعانىمدى قۋانا سۇيىنشىلەيمىن. مەن قىتاي، ءۇندىستان، رەسەي جانە باسقا دا ءداستۇرلى شاحمات ەلدەرىنىڭ نامىسىن قورعايتىن الەمنىڭ ۇزدىك سپورتشىلارىمەن ويناۋعا مۇمكىندىك الدىم. جارىس قيىن ءارى تارتىستى ءوتتى. تۋرنير قاشىقتىعى - 11 ويىننان كەيىن مەن جانە قىتايدان شىققان بۇرىنعى الەم چەمپيونى تان چجۋني تەڭ ۇپاي جينادىق. ال تاي-برەيكتىڭ سوڭىندا مەن ودان جەڭىلىپ قالدىم. ءبىر جىل بويى الاڭعا شىقپاعانىمدى ەسكەرسەك، الەم چەمپيوناتىنىڭ «كۇمىسى» لايىقتى ناتيجە دەپ ەسەپتەيمىن»، - دەپ جازدى دينارا ءسادۋاقاسوۆا ءوزىنىڭ Instagram- داعى پاراقشاسىندا.

ەسكە سالساق، الماتى قالاسىندا شاحماتتان ءوتىپ جاتقان الەم چەمپيوناتىندا قازاقستاندىق دينارا ءسادۋاقاسوۆا راپيدتەن كۇمىس جۇلدەگەر اتاندى.

وسى جەڭىسىمەن دينارانى مەملەكەت باسشىسى قاسىم-جومارت توقايەۆ قۇتتىقتادى.

ايتا كەتەيىك، شاحماتتان 2022-جىلعى الەم چەمپيوناتى الماتىدا 25- جەلتوقسان كۇنى باستالدى. جاھاندىق دوداعا 50 ەلدىڭ ۇزدىك 290 شاحماتشىسى قاتىسىپ جاتىر.