الماتىداعى ۋنيۆەرسيتەتتەر قونايەۆقا قالاي كوشىرىلەدى
بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن عىلىم جانە جوعارى ءبىلىم ءمينيسترى ساياسات نۇربەك ايتتى.
«پرەزيدەنت قونايەۆ قالاسىنان ۇلكەن اكادەميالىق قالاشىق اشۋ تۋرالى تاپسىرما بەردى. الماتى وبلىسىنىڭ اكىمدىگىمەن تۇجىرىمدامانى دايىندادىق. قالادان 97 گەكتار جەر ءبولىندى. ول جەر ارنايى يندۋستريالدىق-وندىرىستىك الاڭ بولادى. ەندى كەلەسى جىلى وسى 97 گەكتار جەرگە الماتىدان قالاعان جوعارى وقۋ ورىندارىن اقىرىنداپ كوشىرۋدى باستايمىز»، - دەپ جاۋاپ بەردى ساياسات نۇربەك ءتىلشى ساۋالىنا وراي.
ونىڭ سوزىنشە، وقۋ ورىندارىنا كوشۋ ءۇشىن ەكى جول ۇسىنىلادى. ۋنيۆەرسيتەتتەردىڭ قونايەۆ قالاسىنا كوشۋى ەرىكتى تۇردە جۇرگىزىلەدى.
«ءبىرىنشىسى - ءبىز جاتاقحانامەن جابدىقتاعاندا ستۋدەنتتەر سول قونايەۆتا تۇرىپ، ساباققا جەدەل ەلەكتر پويىزدارىمەن بارىپ، كەشكە قونايەۆقا سونىمەن قايتادى. ونى الماتى وبلىسىنىڭ اكىمدىگىمەن پىسىقتاپ جاتىرمىز. مۇنداي فورمات كوپ جەرلەردە بار نەگىزى. ەكىنشى - ەگەر الماتىعا مۇلدەم سىيماي جاتقان ۋنيۆەرسيتەت بولسا، ونىڭ قونايەۆتا ءوز كامپۋسىن اشۋىنا بولادى. بارلىعى ۋنيۆەرسيتەتتەردىڭ نيەتىنە بايلانىستى ەرىكتى تۇردە جۇرگىزىلەدى»، - دەپ تۇيىندەدى مينيستر.
قوسا كەتەيىك، ءتىلشى ساۋالىنا جاۋاپ بەرگەن ساياسات نۇربەك جاتاقحانا ماسەلەسىن شەشۋ جولدارىن دا اتاپ وتكەن بولاتىن.
