ەلوردانىڭ قىسقى سپورت ماۋسىمى شاڭعى تەبۋمەن باستالادى
شارا اياسىندا شاڭعى جارىسى، گىر تاسىن كوتەرۋ، قول كۇرەسى، ارقان تارتىس جانە بەلبەۋ كۇرەسى سەكىلدى سپورت تۇرلەرىنەن جارىستار ۇيىمداستىرىلادى.
قالالىق سپورت باسقارماسى باسپا ءسوز ورتالىعىنىڭ مالىمەتىنشە، جارىسقا جەكە سپورتتىق جابدىقتارى بار كەز كەلگەن قالا تۇرعىندارى قاتىسا الادى. تىركەلۋ كەزىندە جەكە كۋالىك بولۋى قاجەت.
«استانادا قىسقى سپورتتىق ماۋسىم العاشقى بۇقارالىق شاڭعى جارىسىمەن اشىلادى. جىل سايىن قىسقى سپورت تۇرلەرىنەن ماۋسىمنىڭ اشىلۋىنا قالانىڭ مىڭداعان تۇرعىنى مەن قوناعى جينالادى. ولاردىڭ اراسىندا مەكتەپ وقۋشىلارى، ستۋدەنتتەر، كۇش قۇرىلىمدارىنىڭ قىزمەتكەرلەرى جانە قوعام وكىلدەرى سپورت جارىستارىنا قاتىسىپ، كۇش سىناسادى. بۇل رەتتە باستىسى جەڭىسكە جەتۋ ەمەس، ويتكەنى جىل سايىنعى شاڭعى فەستيۆالى وتباسىلىق جانە كورپوراتيۆتىك دەمالىستىڭ جاقسى ءبىر ءتۇرى بولىپ تابىلادى. شاراعا قاتىسۋشىلاردى تىركەۋ تاڭعى ساعات 09.30 دا، ال شاڭعى جارىسى مەن سپورتتىق سايىستار ساعات 11.00 دە باستالادى. شاڭعى جارىسىنىڭ ستارتتىق نومىرلەرى ءاربىر جاس توبىنا قاراي جارىس باستالماستان 30 مينۋت بۇرىن بەرىلەدى. جىل سايىن ءداستۇرلى تۇردە وتەتىن سپورتتىق شارالار مەن شاڭعى جارىسىنىڭ جەڭىمپازدارى مەن جۇلدەگەرلەرى ءار جاس توبى بويىنشا باعالى سىيلىقتارمەن، ديپلومدارمەن جانە مەدالدارمەن ماراپاتتالاتىن بولادى. قالا تۇرعىندارى مەن قوناقتارىن قىسقى شاڭعى ماۋسىمىنىڭ اشىلۋىنا وراي وتەتىن سپورتتىق مەرەكەگە قاتىسۋعا شاقىرامىز»، - دەيدى قالالىق سپورت باسقارماسىنىڭ باسپا ءسوز حاتشىسى مادينا ايتقاليەۆا.
استانا قالاسى اكىمدىگىنىڭ قولداۋىمەن قالالىق دەنە شىنىقتىرۋ جانە سپورت باسقارماسى ۇيىمداستىراتىن ءىس-شارا ساعات 11.00 دە شاڭعىروللەر تاسجولىندا (ساياباق ايماعىندا ورنالاسقان Astana Park Hotel تۇران 2/2 ) باستالادى.
