قازاقستاندىق وقۋشىلار جەكەمەنشىك ورتالىقتاردا روبوتوتەحنيكانى تەگىن وقي الادى - مينيستر
«كەزدەسۋگە جەكەمەنشىك ءبىلىم بەرۋ ورتالىقتارىنىڭ، فەدەراتسيالار مەن روبوتوتەحنيكا قاۋىمداستىعىنىڭ باسشىلارى جانە جاتتىقتىرۋشىلارى، مەكتەپ مۇعالىمدەرى قاتىستى. وقۋشىلار اراسىندا STEM- ءدى دامىتۋ بويىنشا ودان ءارى قارايعى بىرلەسكەن جۇمىستاردى تالقىلادىق.
وقۋشىلارىمىزدىڭ روبوتوتەحنيكادان ۇزدىك ناتيجە كورسەتىپ جۇرگەنىن ايتا كەتكىم كەلەدى. جۋىردا عانا وقۋشىلارىمىز جەنيەۆادا وتكەن روبوتوتەحنيكادان FIRST GLOBAL CHALLENGE الەم جارىسىندا جەڭىسكە جەتتى. سونداي- اق بالالارىمىز العاش رەت دورتمۋند قالاسىندا وتكەن روبوتوتەحنيكادان حالىقارالىق وليمپيادادا ەكىنشى ورىن الدى. بۇل - ۇلكەن جەتىستىك.
وقۋشىلارىمىزدىڭ جەڭىستەرى دۇرىس باعىتتا كەلە جاتقانىمىزدىڭ ايقىن كورسەتكىشى. سوڭعى 3-4 جىلدا 39 مامانداندىرىلعان IT- ليتسەي اشتىق، وندا 50 مىڭنان استام وقۋشى وقيدى. سونىمەن بىرگە مەكتەپتەردە روبوتوتەحنيكا كابينەتتەرىنىڭ سانى 3 مىڭعا جەتتى»، - دەپ جازدى، مينيستر ءوزىنىڭ Facebook پاراقشاسىندا.
سونداي- اق ول مەكتەپتەردى جابدىقتاۋدىڭ مينيمالدى ستاندارتتارىن دايىنداپ، وسى تالاپتارعا روبوتوتەحنيكا كابينەتتەرىن قوسقانىن ايتا كەتتى. قازىرگى تاڭدا مۇنداي قۇرال- جابدىقتاردىڭ بولۋى بارلىق ورتا ءبىلىم بەرۋ ۇيىمى ءۇشىن مىندەتتى تالاپ.
بۇل جاعدايدا مىناداي ماسەلەلەردى ەستە ۇستاۋ قاجەت. مىسالى، روبوتوتەحنيكا قۇرالدارى تولىق پايدالانىلمايتىن ۇيىمدار بار. سونداي- اق جيىنتىقتاردى جاڭارتۋ، قوسىمشا بولشەكتەردى، شىعىن ماتەريالدارىن ساتىپ الۋدى قاجەت ەتەتىن ۇيىمدار بار، ءبىراق ءبىلىم بەرۋدىڭ بارلىق ءبولىمى مەن باسقارماسى بۇل جۇمىستى ءتيىستى دەڭگەيدە ۇيىمداستىرماعان.
كەيبىر مەكتەپ باسشىلارى ءبىر رەت ساتىپ الىنعان كەرەك- جاراق الداعى 3-5 جىلعا جەتەدى دەپ ويلايدى. بۇل دۇرىس ەمەس. شىعىن ماتەريالدارىن جاڭارتىپ وتىرۋ قاجەت. سونداي- اق تەمىردى جانە قاراپايىم جيناقتاردى ساتىپ الۋ جۇمىستىڭ از عانا بولىگى ەكەنىن ءتۇسىنۋ كەرەك، ودان دا ماڭىزدىسى - وقۋ- ادىستەمەلىك كەشەندەرمەن جانە بىلىكتىلىكتى ارتتىرۋ كۋرستارىمەن قامتاماسىز ەتۋ.
بالالار روبوتتاردى قۇراستىرۋمەن عانا شەكتەلىپ قالماي، ءارى قاراي دامىپ، وزدەرى باعدارلاما جازىپ، 3D باسىپ شىعارۋدى، گرافيكالىق باعدارلامالاردى، اردۋينونى جانە ت. ب. ۇيرەنۋى ماڭىزدى.
روبوتوتەحنيكا جانە IT بويىنشا مۇعالىمدەردىڭ بىلىكتىلىگىن ارتتىرۋ ماسەلەسى دە وزەكتى. كەلەسى جىلى مۇنداي ارنايى كۋرستارمەن ءار مەكتەپتەن كەم دەگەندە ءبىر ءمۇعالىمدى قامتۋىمىز كەرەك.
باعدارلامالار تەز جاڭارتىلىپ، قاعاز IT وقۋلىقتار تەز ەسكىرەتىندىكتەن، ولاردى (IT وقۋلىقتاردى) ەلەكتروندى فورماتقا كوشىرۋ تۋرالى ۇسىنىستار جاسالدى. بۇعان مىسال رەتىندە باستاۋىش سىنىپتاردا scratch- ءتى وقۋدى ايتۋعا بولادى. وندا باعدارلامانىڭ ءوزىن جاڭارتۋعا بايلانىستى وقۋلىقتاعى كوماندالار، الگوريتمدەر جانە باعدارلامانىڭ ءوزى تۋرالى اقپارات سايكەس كەلمەيدى. ال سيفرلى وقۋلىقتاردى ۋاقىتىلى تۇزەتىپ، جاڭارتىپ وتىرۋعا بولادى.
تاعى ءبىر قۋانىشتى جاڭالىق. كەلەسى جىلدان باستاپ روبوتوتەحنيكا بويىنشا بالالارعا ارنالعان ۇيىرمەلەر مەن سەكسيالارعا جەرگىلىكتى بيۋدجەتتەردەن مەملەكەتتىك تاپسىرىستاردى ورنالاستىرۋ باستالادى. ياعني بالالار ەندى جەرگىلىكتى بيۋدجەت ەسەبىنەن جەكەمەنشىك ورتالىقتاردا روبوتوتەحنيكانى تەگىن وقي الادى. بۇل وقۋشىلارىمىزدىڭ IT - قۇزىرەتتىلىكتەرىن دامىتۋعا جاڭا سەرپىن بەرەتىنى ءسوزسىز.
سونىمەن بىرگە كوللەدج ستۋدەنتتەرى اراسىندا روبوتوتەحنيكانى، اسىرەسە وندىرىستىك روبوتوتەحنيكا مەن مەحاترونيكانى دامىتۋدى جالعاستىرا بەرەمىز. بۇل باعىت ودان ءارى WorldSkills بايقاۋلارىندا جانە باسقا باعدارلامالار اياسىندا جۇزەگە اسىرىلادى.
«وتىرىستا كەڭەس مۇشەلەرىمەن بىرلەسىپ روبوتوتەحنيكانى دامىتۋ جونىندەگى جول كارتاسىن ازىرلەۋ تۋرالى شەشىم قابىلداندى. مينيسترلىك جاڭا ۇسىنىستار مەن باستامالارعا ءارقاشان اشىق»، - دەپ جازدى اسحات ايماعامبەتوۆ.
