قازاق وقۋشىسى كولۋمبيادا وتكەن وليمپيادانىڭ جۇلدەگەرى بولدى

اقتوبە. قازاقپارات - كولۋمبيانىڭ استاناسىندا وتكەن حالىقارالىق وليمپيادانىڭ قولا جۇلدەسىن اقتوبە قالاسىنداعى نازاربايەۆ زياتكەرلىك مەكتەبىنىڭ وقۋشىسى جەڭىپ الدى، دەپ حابارلايدى قازاقپارات ءتىلشىسى.

بوگوتا قالاسىندا ءداستۇرلى حالىقارالىق جاسوسپىرىمدەر عىلىمي وليمپياداسى (IJSO) اياقتالدى. قازاقستاننان زياتكەرلىك دوداعا التى وقۋشى قاتىستى. وليمپيادا قورىتىندىسى بويىنشا ايدانا ايتورە Ⅲ ورىنعا يە بولدى. ول سىناق، تەوريالىق جانە ەكسپەريمەنتتىك تاپسىرمالاردى ءساتتى ورىندادى.

«كولۋمبياعا ساپار وتە قىزىقتى ءوتتى. وليمپيادانىڭ باعدارلاماسى اۋقىمدى بولدى. بۇل ساپاردىڭ جادىمدا ۇزاق ساقتالاتىنىنا سەنىمدىمىن. العان تاجىريبەمدى باسقا وليمپيادالارعا قاتىسقان كەزدە قولدانامىن. وليمپيادانىڭ ەرەكشەلىگى - وقۋشىلار ءبىر عانا ەمەس، بىردەن ءۇش، ياعني، فيزيكا، بيولوگيا، حيميا پاندەرىنەن تاپسىرمالار ورىندايدى. قازاقستاننان ءۇش ءپان بويىنشا ۇزدىك ناتيجە كورسەتكەن 6 ادام ىرىكتەلدى. ءبىرىنشى كەزەڭدە ءار ءپان بويىنشا 10 سۇراق كەلدى. ەكىنشى كەزەڭ تەوريالىق، ءۇشىنشى كەزەڭ ەكسپەريمەنتتىك. سوڭعىسىنا كوماندا بولىپ قاتىستىق»، - دەپ ءبولىستى ايدانا ايتورە.

وليمپيادا وفلاين فورماتتا 2-12-جەلتوقسان ارالىعىندا ءوتتى. بيىل كولۋمبيادا 70 ەلدىڭ ەڭ مىقتى فيزيكتەرى، بيولوگتارى مەن حيميكتەرى باس قوستى.