اقيىق اقىن مۇحتار شاحانوۆ «قۇرمەتتى پروفەسسور» اتاندى
ىرگەتاسى 1937 -جىلى قالانعان، عاسىرعا جۋىق تەرەڭ تاريحىمەن وڭتۇستىك ءوڭىرىنىڭ ءبىلىم قاراشاڭىراعىنا اينالعان وقۋ ورداسىنىڭ مەرەيلى مەرەكەسىنە وسىندا ءبىلىم العان ەلگە بەلگىلى اتاقتى جاندار، قىزمەت جولىن وسىناۋ ۋنيۆەرسيتەتپەن ۇشتاستىرعان تانىمال تۇلعالار قاتىستى.
تۇركىستان سارايىندا وتكەن سالتاناتتى شارادا قۇتتىقتاۋ ءسوز العان شىمكەنت قالاسىنىڭ اكىمى مۇرات ايتەنوۆ جۇرەكجاردى لەبىزىن ءبىلدىردى. قالا باسشىسى 1937 -جىلى مۇعالىمدەر دايارلايتىن ينستيتۋت بولىپ اشىلعان ءبىلىم ورداسى وسى ۋاقىتقا دەيىن شىمكەنت قالاسىمەن بىرگە ءتۇرلى دامۋ ساتىلارىنان ءوتىپ، بۇگىندە تاريحى مەن بولاشاعى ساباقتاسىپ جاتقان زاماناۋي، بەدەلدى ۋنيۆەرسيتەتكە اينالىپ وتىرعانىن جەتكىزدى. وقۋ ورداسىنىڭ تاريحىنان سىر شەرتكەن شاھار باسشىسى بۇگىندە مەملەكەت باسشىسى قاسىم- جومارت كەمەل ۇلى توقايەۆتىڭ باستاماسىمەن ەلىمىزدە اۋقىمدى رەفورمالار جۇزەگە اسىرىلىپ جاتقانىن تىلگە تيەك ەتتى.
«حالقىمىز ادىلەتتى قازاقستان، اشىق ءارى ادىلەتتى قوعامنىڭ توڭىرەگىندە توپتاسۋدا. وسىناۋ اسقاق ماقساتقا قول جەتكىزۋ ءۇشىن، ەڭ الدىمەن، ۇلت جاڭا ساپاعا كوتەرىلۋى ءتيىس. دەمەك، ۇلتتىق مودەرنيزاتسيانىڭ ءساتتى جۇزەگە اسۋى - وتاندىق ءبىلىم بەرۋ ءىسىنىڭ دامۋىنا تىكەلەي بايلانىستى. وسى ورايدا، پاراساتتى مەملەكەت قۇرۋ جولىندا بولاشاق ۇستازداردى دايارلايتىن بەدەلدى وقۋ ورنى رەتىندە و ق م پ ۋ ەرەكشە ءرول اتقارماق»، - دەدى مۇرات دۇيسەنبەك ۇلى. قالا اكىمى جۇمىسىن جەمىستى اتقارىپ جۇرگەن ۋنيۆەرسيەتتىڭ ءبىرقاتار قىزمەتكەرىنە العىسحات تابىس ەتتى.
مۇنان سوڭ قۇتتىقتاۋلار لەگىن قازاقستان رەسپۋبليكاسى پرەزيدەنتى كەڭەسشىسى مالىك وتاربايەۆ پەن قازاقستان رەسپۋبليكاسى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ جالعاستىردى. ول مينيستر ساياسات نۇربەكتىڭ قۇتتىقتاۋ حاتىن جەتكىزىپ، ءبىلىم جانە عىلىم سالاسىندا ادال دا ابىرويلى ەڭبەك ەتىپ جۇرگەن ۇستازدار قاۋىمىن ماراپاتتادى.
ال و ق م پ ۋ باسقارما ءتوراعاسى - رەكتور گۇلجان سۇگىربايەۆا ستۋدەنتتەر مەن ۇجىمداستاردى قۇتتىقتاپ، جوعارى ءبىلىمنىڭ شەجىرەلى قاراشاڭىراعى سانالاتىن وقۋ ورداسىنىڭ كەشەگى تاريحى مەن بۇگىنگى اسۋلارى جايلى باياندادى. شىندىق ءۇشىن كۇرەسىپ جالىندى جىرلارىمەن ۇلت رۋحىن وياتقان اقيىق اقىن مۇحتار شاحانوۆتى و ق م پ ۋ «قۇرمەتتى پروفەسسور»، سونداي-اق وقۋ ورداسىن ءار جىلدارى باسقارعان ابدىمالىك ءاشىروۆ، وڭالبەك جارىلقاسىن، وڭالباي اياشەۆ سىندى تۇلعالارعا «قۇرمەتتى رەكتور» اتاعىمەن ماراپاتتادى.
سالتاناتتى جيىن ەسترادا جۇلدىزدارىنىڭ كونتسەرتتىك باعدارلاماسىنا ۇلاستى.
ايتىپ وتەيىك، و ق م پ ۋ- دا ستۋدەنتتەردىڭ ءبىلىم الۋىنا ىڭعايلى جاعداي جاسالعان. 3 وقۋ كورپۋسى مەن 4 ستۋدەنتتەر ءۇيى تەراپيا كابينەتتەرى، كىتاپحانا مەن وقۋ زالدارى جانە باسپاحانا ستۋدەنتتەرگە تاۋلىك بويى قىزمەت ەتۋدە. ۋنيۆەرسيتەت تۇلەكتەرىنىڭ جۇمىسپەن قامتىلۋ كورسەتكىشى جىلدان- جىلعا ءوسىپ كەلەدى. سوڭعى 3 جىلدا وقۋ ورداسىن بىتىرگەن تۇلەكتەردىڭ 95 پايىزى جۇمىسپەن قامتىلعان.
