قازاقستاندىق بالۋان ەركىن كۇرەستەن الەم كۋبوگىنىڭ قولا جۇلدەگەرى اتاندى

استانا. قازاقپارات - قازاقستاندىق بالۋان ازامات داۋلەتبەكوۆ ا ق ش- تىڭ ايوۆا شتاتىنداعى كورالۆيلل قالاسىندا ەركىن كۇرەستەن وتكەن الەم كۋبوگى جارىسىندا قولا جۇلدەگەر اتاندى، دەپ حابارلايدى قازاقپارات ءتىلشىسى.

«سپورتتى دامىتۋ ديرەكتسياسى» ر م ق ك- دان ءمالىم ەتكەنىندەي، ازامات 86 كەلىگە دەيىنگى سالماقتا الەم قۇراماسى ساپىندا كىلەمگە شىقتى.

الەم قۇراماسى باسەكەنى ەكىنشى اينالىمنان باستادى. وندا ا. داۋلەتبەكوۆ جاپونيالىق تاتسۋيا شيرايدى 9:1 ەسەبىمەن تىزە بۇكتىردى. دەگەنمەن جارتىلاي فينالدا يراندىق اليرەزا مۇحاممەد كاريميماچيانيگە جول بەردى.

ازامات قولا جۇلدە ءۇشىن بەلدەسۋدە گرۋزيالىق ساندرو اميناشۆيليدى 8:2 ەسەبىمەن ۇتىپ، ۇزدىك ۇشتىككە ىلىكتى.

ەسكە سالا كەتەيىك، بۇدان بۇرىن ۇستەل تەننيسىنەن الان قۇرمانعاليەۆتىڭ الەم چەمپيوناتىندا التىنعا قوسا قولا مەدال جەڭىپ العانىن جازعان بولاتىنبىز.