قازاقستاندا وزبەكستاننىڭ مادەنيەت كۇندەرى ءوتتى - فوتو

استانا. قازاقپارات - قازاقستاندا وزبەكستاننىڭ مادەنيەت كۇندەرى ءوتتى. بۇل تۋرالى ق ر مادەنيەت جانە سپورت مينيسترلىگىنەن ءمالىم ەتتى، دەپ حابارلايدى قازاقپارات.

قازاقستان مەن وزبەكستان اراسىندا ديپلوماتيالىق قاتىناستاردىڭ ورناعانىنا 30 جىل تولۋىنا وراي ۇيىمداستىرىلعان مەرەكەلىك ءىس-شارالار اياسىندا دوڭگەلەك ۇستەل وتىرىستارى، كورمەلەر مەن شەبەرلىك ساباقتار ۇيىمداستىرىلدى. سونداي-اق قازاقستاندىق كورەرمەنگە قازاق تىلىندە تيفلوكوممەنتاريلەرى بار «شاي» قىسقامەتراجدى فيلمى ۇسىنىلدى. قاليبەك قۋانىشبايەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىندا وتكەن گالا-كونسەرتتە وزبەكستان رەسپۋبليكاسىنىڭ جەتەكشى سوليستەرى مەن شىعارماشىلىق ۇجىمدارى ونەر كورسەتتى.

«ءبىزدى ەكى مىڭ شاقىرىمنان استام شەكارا عانا ەمەس، ەكى مىڭجىلدىق تاريح بىرىكتىرەدى. بىزگە ارنايى الىپ كەلگەن مازمۇنى تەرەڭ، ماعىناسى باي باعدارلامالار كوشى سول يگى ساباقتاستىقتى جالعاستىرىپ وتىر. الايدا، قوس تاراپ بۇل رۋحاني بايلانىسپەن تەجەلىپ قالماۋى ءتيىس. الداعى ۋاقىتتا مادەني الماسۋدان بولەك، بىرلەسكەن ورتاق جوبالاردى جۇزەگە اسىرۋ قاجەت. ءبىز بۇرىننان تاتۋلىقتى تابىسقا، بىرلىكتى بەرەكەگە اينالدىرىپ كەلە جاتقان اعايىنداس حالىقتارمىز. ءتۇبى ءبىر تۇركى الەمىنىڭ قوس قازىعىنداي قازاق- وزبەك قاتىناسى نىعايا بەرۋىنە شىن جۇرەكتەن تىلەكتەسپىن»، - دەدى مادەنيەت جانە سپورت ءمينيسترى داۋرەن ابايەۆ.

ءوز كەزەگىندە وزبەك تاراپى مادەنيەت جانە سپورت مينيسترلىگىنە ءىس-شارالاردى ۇيىمداستىرۋعا كومەكتەسكەنى ءۇشىن العىس ايتىپ، قازاقستان تاراپىنىڭ جوبالارى مەن باستامالارىنا جوعارى قىزىعۋشىلىق تانىتقانىن اتاپ ءوتتى.