وقۋشىلار اراسىندا قارجى ساۋاتىنان وليمپيادا وتەدى

استانا. قازاقپارات - وقۋشىلار اراسىندا قارجىلىق ساۋاتتان وليمپيادا وتەدى. قارجى مونيتورينگى اگەنتتىگى مەن وقۋ-اعارتۋ مينيسترلىگى وسىنداي پيلوتتىق جوبانى قولعا الماقشى، دەپ حابارلايدى قازاقپارات ءتىلشىسى.

«اگەنتتىكتىڭ باستاماسى بويىنشا، قىركۇيەك ايىندا وقۋ اعارتۋ مينيسترلىگى 5-11- سىنىپتاردىڭ ۇلگىلىك وقۋ جوسپارىنىڭ ۆارياتيۆتىك كومپونەنتىنە «بيزنەس جانە كاسىپكەرلىك نەگىزدەرى» جانە «قارجىلىق قاۋىپسىزدىك» اتتى بولىمدەردەن تۇراتىن «جاھاندىق قۇزىرەتتەر» كۋرسىن ەنگىزدى. حالىقارالىق وقۋ-ادىستەمە ورتالىعىنىڭ قاتىسۋىمەن كورنەكى ماتەريالدارى بار وقىتۋ ادىستەمەسى جاسالدى. سونىمەن قاتار، الدىن الۋدىڭ قوسىمشا قۇرالى رەتىندە قارجىلىق قاۋىپسىزدىك بويىنشا وليمپيادانى وتكىزۋ جوسپارلانىپ وتىر. مۇنداي تاجىريبەنى كوپتەگەن ەلدەر قولدانادى. قازاقستاننان ستۋدەنتتەرى بيىل رەسەي فەدەراتسياسىنىڭ سوچي قالاسىندا وتكەن حالىقارالىق وليمپيادادان جۇلدەلى ورالدى. وليمپياداعا ىرىكتەۋگە الەمنىڭ 12 ەلىنەن 40 مىڭنان استام ستۋدەنت قاتىسقان بولاتىن»، - دەدى قارجى مونيتورينگى اگەنتتىگى كادرلىق جۇمىس دەپارتامەنتىنىڭ ديرەكتورى نۇرلان اداليەۆ.

ايتۋىنشا، اتالمىش وليمپيادا وقۋشىلار اراسنىدا پيلوتتىق رەجيمدە وتپەك.

«بيىلعى وقۋ جىلىنان باستاپ ەلىمىزدىڭ ءبىرقاتار وڭىرىندە وقۋشىلار اراسىندا قارجىلىق قاۋىپسىزدىكتەن پيلوتتىق وليمپيادا وتكىزۋ تۋرالى كەلىسىم بار. ونى دايىنداۋعا حالىقارالىق جوعارى وقۋ ورىندارىنىڭ وكىلدەرى مەن اگەنتتىك وكىلدەرى اتسالىستى. 2023-جىلى قارجىلىق ساۋاتتىلىق بويىنشا ساباقتار وتكىزىپ، وليمپيادانى ۇيىمداستىرۋ ۇسىنىسىن وقۋ-اعارتۋ مينيسترلىگىنىڭ عىلىمي ساراپتاماسى وڭ باعالاپ، ماقۇلداپ وتىر»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.