تىزگىندى ساۋاتتى ساياساتكەر ۇستاۋى كەرەك بولدى - ساراپشى تاسماعامبەتوۆتىڭ جاڭا لاۋازىمى تۋرالى

استانا. قازاقپارات - ساياسات تانۋشى مارات شيبۇتوۆ يمانعالي تاسماعامبەتوۆتىڭ ۇجىمدىق قاۋىپسىزدىك شارت ۇيىمىنىڭ باس حاتشىلىعىنا تاعايىندالۋى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

ساراپشى ۇيىمنىڭ باسشىلىعىنا جاي عانا اسكەري ادام ەمەس، ساۋاتتى ساياساتكەر قاجەت بولعانىن ايتادى.

«نەگە مۇنداي تاعايىنداۋ بولدى؟ مۇنىڭ 4 سەبەبى بار. بىرىنشىدەن، كەزەكتىلىك ءتارتىبى بويىنشا الداعى 3 جىلدا قازاقستان وكىلى ۇيىمنىڭ باس حاتشىسى بولۋى كەرەك. ەكىنشىدەن، قازىر ۇ ق ش ۇ-نىڭ نەگىزگى پروبلەماسى ارمەنيا مەن ازەربايجاننىڭ اراسىنداعى كيكىلجىڭ بولىپ تۇر. قايتا- قايتا اتىس بولىپ، ارمەنيانىڭ ەل بولىپ قالۋىنا قاۋىپ تونە باستادى. ساياسي تۇرعىدان العاندا ارمەنيانىڭ مۇددەسىن قازاق قورعاعانى كەرەك. سوندا ازەربايجاندىقتاردىڭ ۇستانىمى جۇمساقتاۋ بولادى»، - دەپ جازدى ساياساتتانۋشى.

ساراپشى بۇعان دەيىن ۇيىم تىزگىنىن ۇستاعان تۇلعالاردىڭ ەشبىرىندە يمانعالي تاسماعامبەتوۆتىكىندەي ساياسي تاجىريبە بولماعانىن، ونىڭ ءبىر كەزدەرى قازاقستان پرەمەر-ءمينيسترى، پرەزيدەنت اكىمشىلىگىنىڭ باسشىسى بولعانىن ەسكە سالادى.

«قازىر ۇ ق ش ۇ ءۇشىن قيىن كەزەڭ بولىپ تۇر. سوندىقتان، حاتشىلىقتا جاي عانا اسكەري ادام ەمەس، ساۋاتتى ساياساتكەر بولعانى كەرەك. ال، تورتىنشىدەن، تاسماعامبەتوۆتىڭ قازاقستاننىڭ قورعانىس ءمينيسترى بولعان تاجىريبەسى بار جانە رەسەيمەن بايلانىسى وتە جاقسى. بۇل بايلانىس سەرگەي گروموۆتان رامزان كادىروۆقا دەيىن كەتىپ جاتىر. بۇل - وتە ماڭىزدى. ويتكەنى، رەسەي - ۇ ق ش ۇ- نىڭ نەگىزگى مۇشەسى جانە ۇيلەستىرۋشى مەملەكەت»، - دەپ جازدى مارات شيبۇتوۆ.

بۇعان دەيىن حابارلانعانىنداي، يمانعالي تاسماعامبەتوۆ ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى لاۋازىمىنا تاعايىندالدى.