فۋتبولدان ءا چ: فرانسيا اۋستراليانى ءىرى ەسەپپەن ۇتتى
بۇدان ءتورت جىل بۇرىن ديدە ديشام جاتتىقتىراتىن فرانسۋزداردىڭ الەم چەمپيونى اتانعانى بەلگىلى.
العاش رەت الەم چەمپيونى اتاعىن 1998 -جىلى جەڭىپ العان فرانسۋزدار بۇل جولى دا تيتۋلدان دامەلى ەكەنى انىق. الايدا بۇل دۇنيەجۇزىلىك دوداعا د. ديشام شاكىرتتەرى بيىلعى «التىن دوپ» يەگەرى، شابۋىلشى كاريم بەنزەما باستاعان بىرنەشە بەلدى ويىنشىسىنسىز كىرىسىپ وتىر.
اۋستراليالىقتار سوڭعى كەزدە الەم چەمپيوناتىنا تۇراقتى قاتىسىپ كەلەدى. 1974 -جىلى ولار توپتان شىعا الماسا، 2006 -جىلى 1/8 فينالعا دەيىن جەتىپ، بولاشاق الەم چەمپيوندارى - يتالياعا 0:1 ەسەبىمەن جول بەردى. وڭتۇستىك افريكا رەسپۋبليكاسى، برازيليا جانە رەسەيدە وتكەن بىرىنشىلىكتەردە اۋستراليا توپتىق باسەكەمەن شەكتەلدى. ءتورت جىل فرانسيا، دانيا جانە پەرۋمەن ءبىر توپتا بولىپ، جالعىز ۇپايعا عانا قول جەتكىزدى.
قۇرامالار ءوزارا بەس رەت باق سىناسسا، سونىڭ ۇشەۋى جولداستىق كەزدەسۋ ەدى. مۇندا فرانسۋزدار ەكى رەت (1:0، 6:0) جەڭىپ، بىرەۋىندە تەڭ ءتۇستى (1:1). ال 2001 -جىلى كونفەدەراتسيا كۋبوگىندە اۋستراليالىقتار فرانسيانى 1:0 ەسەبىمەن تىزە بۇكتىردى. 2018 -جىلى رەسەيدە فرانسۋزدار ەسە قايتاردى - 2:1.
بۇل جولى الەم چەمپيوندارى ماتچتى قارقىندى باستاعانىمەن، 9-مينۋتتا اۋستراليالىقتار ەسەپ اشىپ كەتتى. وڭ قاناتتان سۋىرىلىپ، العا شىققان مەتيۋ لەكي فرانسيالىق قورعاۋشى لۋكاس ەرناندەستى قاپى قالدىرىپ، كرەيگ گۋدۆينگە ءدال پاس بەردى. وعان قوسا وسى ساتتە ل. ەرناندەس جاراقات الىپ، ورنىنا تۋعان ءىنىسى تەو شىقتى.
فرانسيانىڭ ورشەلەنە العا ۇمتىلعان قيمىلى ءوز جەمىسىن بەردى. 27-مينۋتتا ت. ەرناندەستەن پاس العان جارتىلاي قورعاۋشى ادريەن رابو تارازى باسىن تەڭەستىردى - 1:1. ارادا 5 مينۋت وتكەندە، ا. رابونىڭ پاسىنان كەيىن وليۆە جيرۋ فرانسيانى العا شىعاردى - 2:1. بۇدان سوڭ كيليان مباپپە وڭتايلى ءساتتى ءمۇلت جىبەردى. ال تايم سوڭىنا تامان اۋستراليالىق دجەكسون يرۆيننىڭ باسپەن سوققان دوبى قاقپا جاقتاۋىنان كەرى قايتتى.
ەكىنشى كەزەڭدە 68-مينۋتتا وسىدان ءتورت جىل بۇرىنعى الەم چەمپيوناتىنىڭ ۇزدىك جاس ويىنشىسى اتانعان ك. مباپپە ۋسمان دەمبەلەنىڭ پاسىن قۇر جىبەرگەن جوق - 3:1. ارادا 3 مينۋت وتكەندە، سول قاناتتا جاسىنداي جارقىلداعان ك. مباپپەنىڭ پاسىنان كەيىن و. جيرۋ ەسەپتى 4:1-گە جەتكىزدى. بۇل جيرۋدىڭ ۇلتتىق قۇراما ساپىنداعى 51-گولى ەدى.
وسىلايشا، D توبىندا اۋستراليانى ءىرى ەسەپپەن ۇتقان فرانسيا ءۇش ۇپايمەن جەكەدارا كوش باستادى. دانيا مەن تۋنيستە ءبىر-بىردەن ۇپاي بار.
ەندى 26-قاراشا كۇنى تۋنيس - اۋستراليا، فرانسيا - دانيا ويىندارى وتەدى.
ەسكە سالا كەتەيىك، بۇدان بۇرىن فۋتبولدان بيىلعى «التىن دوپ» يەگەرىنىڭ الەم چەمپيوناتىنان تىس قالعانىن جازعان بولاتىنبىز.
سونداي-اق كريشتيانۋ رونالدۋ فۋتبولدان الەم چەمپيوناتىنىڭ فاۆوريتتەرىن اتادى.
ارگەنتينا قۇراماسى الەم چەمپيوناتىندا ساۋد ارابياسىنان جەڭىلدى.
دانيا مەن تۋنيس قۇرامالارى تەڭ تارقاستى.
ال ارگەنتينانى جەڭۋ قۇرمەتىنە ساۋد ارابياسىندا سارسەنبى دەمالىس كۇنى بولىپ جاريالاندى.
كريشتيانۋ رونالدۋ بولسا «مانچەستەر يۋنايتەد» كلۋبىنان كەتتى.
