مۇعالىمدەردى جۇمىسقا الۋدىڭ ورتالىقتاندىرىلعان پلاتفورماسى ىسكە قوسىلادى - ايماعامبەتوۆ
بۇل جايىندا ق ر وقۋ-اعارتۋ ءمينيسترى اسحات ايماعامبەتوۆ ۆەدومستۆونىڭ اپپارات جينالىسىندا مالىمەت بەردى، دەپ حابارلايدى قازاقپارات ءتىلشىسى.
«بۇل وتە ماڭىزدى ماسەلە، پەداگوگتەر ايقىن، اشىق، ءادىل جولمەن جۇمىسقا قابىلدانۋى كەرەك. سول ءۇشىن ءبىز زاڭنامانى وزگەرتىپ، جاڭا جۇيەنى ەنگىزدىك. «اۋرۋىن جاسىرعان ولەدى»، - دەگەندەي ءبىز وسىنداي جەرگىلىكتى دەڭگەيدەگى بولىپ جاتقان ماسەلەلەردى جاسىرمايمىز، ايقىن كورسەتۋىمىز كەرەك. ءارى قاراي دا باقىلاپ، تەكسەرىپ وتىرامىز. قالاسا دا، قالاماسا دا، كىمنىڭ مۇددەسى بولسا دا ءبىز بۇل ماسەلە بويىنشا ناقتى ادىلدىكتى ورناتامىز. مۇعالىمدەر تەك قانا كونكۋرسپەن، بىلىكتىلىگىن دالەلدەپ، ديپلوم بويىنشا جۇمىسقا الىنۋى كەرەك»، - دەدى مينيستر.
مينيسترلىك بۇل پروبلەمانى ارنايى پلاتفورما ارقىلى شەشۋدى جوسپارلاپ وتىر.
«جوعارىدا كورسەتىلگەن پروبلەمالاردى جۇيەلى شەشۋ ءۇشىن ەندى ورتالىقتاندىرىلعان ارنايى سيفرلىق پلاتفورمانى وسى جەلتوقسان ايىندا ىسكە قوسۋعا دايىندىق جۇمىستارىن اياقتاپ جاتىرمىز. ياعني، ەندى بۇكىل مەكتەپتەر جۇمىسقا الۋ ءۇشىن وسى پلاتفورما ارقىلى وزدەرىنىڭ ۆاكانسيالارىن كورسەتىپ، بارلىق ماسەلەلەردى ايقىن، اشىق جۇرگىزىپ، ناقتى ءتيىستى شەشىمدى ىسكە اسىرۋعا مۇمكىندىك الادى. ويتكەنى ءبىز كورىپ وتىرمىز. حابارلاندىرۋدى ەكى ساعات ءىلىپ قويادى دا، ەكى ساعاتتان كەيىن الىپ تاستاپ، «ءبىز حابارلاندىرۋدى ىلدىك» دەگەن سياقتى وسىنداي سىلتاۋلار بار»، - دەدى اسحات ايماعامبەتوۆ.
