وزگە كانديداتتار نەگە از داۋىس الدى – ا ق ش ساراپشىسىنىڭ پىكىرى

استانا. قازاقپارات – ا ق ش- تىڭ دجەيمستاۋن قورىنىڭ اعا عىلىمي قىزمەتكەرى مارگاريتا اسسەنوۆا قازاقستاندا كەزەكتەن تىس وتكەن پرەزيدەنت سايلاۋىندا التى كانديداتتىڭ بەسەۋى نەگە تىم از داۋىس العانى تۋرالى پايىمىن ءبولىستى، دەپ حابارلايدى قازاقپارات ءتىلشىسى.

«سايلاۋ جاقسى ۇيىمداستىرىلىپ، وتكىزىلگەنىن كوردىك. سونشالىقتى ۇلكەن ءبىر پروبلەما دا بايقاعان جوقپىز. ءبىزدىڭ بايقاۋشىلار دا ءوزىمىز سويلەسۋگە مۇمكىندىك العان وزگە حالىقارالىق بايقاۋشىلار سياقتى قانداي دا ءبىر پروبلەما كورگەن جوق. كەشەگى سايلاۋدا نەنى بايقادىق؟ جالپى، حالىقتىڭ بۇكىل نازارى جالعىز كانديداتقا ويىستى. ول ادام اقىرىندا سايلاۋدا جەڭىسكە جەتتى جانە الداعى 7 جىلدا پرەزيدەنت بولادى. بۇل - جاقسى. ال وزگە كانديداتتار وتە از داۋىس الدى. ءبىز سويلەسكەن سايلاۋشىلاردىڭ ءبارى باسقا كانديداتتاردى مۇلدە تانىمايتىنىن ايتتى. ولار سايلاۋعا دەيىن اتالعان كانديداتتاردى مۇلدە كورمەگەن، ولار جايلى ەشقاشان ەستىمەگەن، ەشتەڭە بىلمەگەن. سوندىقتان سايلاۋشىلار وزدەرى جاقسى تانيتىن جانە ەلدە رەفورما جۇرگىزىپ جاتقان كانديداتقا داۋىس بەرەدى. پرەزيدەنت ق. توقايەۆتىڭ پايداسىنا نەگە سونشا كوپ داۋىس بەرىلگەنىن وسىمەن تۇسىندىرۋگە بولادى»، - دەدى مارگاريتا اسسەنوۆا.

ونىڭ پايىمىنشا، كانديداتتار اراسىندا قازىرگى پرەزيدەنتتەن باسقا دا بىلىكتى ۇمىتكەرلەر بولعان. ءبىراق ولارعا تانىمالدىلىق جەتىسپەگەن.

«تاعى ءبىر ماسەلە، كەي كانديداتتار شىنىمەن دە جوعارى بىلىكتى، ساپالى ۇمىتكەر بولدى. ولاردىڭ بەكگراۋندى شىنىمەن دە پرەزيدەنت، مينيستر دەڭگەيىندەگى باسشىلىق لاۋازىمداردى اتقارۋعا لايىق ەدى. ءبىراق ولاردىڭ 30 كۇن عانا ۋاقىتى بولدى. وسى 30 كۇننىڭ ىشىندە ءوز ۇگىت-ناسيحاتىن بۇكىل ەل بويىنشا جۇرگىزىپ، وزدەرىن تانىتۋ ءۇشىن سايلاۋشىلارمەن كەزدەسىپ، سويلەسۋى كەرەك ەدى. وسىنىڭ بارىنە ەگەر كانديدات ابدەن قالىپتاسقان، كۇن سايىن تەلەديداردان كورسەتىپ جاتاتىن كوشباسشى تۇلعا بولماسا، 30 كۇن جەتكىلىكسىز ەدى. جاريا كەڭىستىككە ەندى عانا شىققان كەز كەلگەن كانديداتقا 30 كۇن جالپى جۇرتتىڭ قولداۋىنا يە بولۋ ءۇشىن جەتكىلىكسىز. سوندىقتان ولار 2-3 پايىز عانا داۋىس الدى. ءبىز ءوز مالىمدەمەمىزدە كەلەشەكتە ۇگىت-ناسيحاتقا بەرىلەتىن ۋاقىتتى ۇزارتىپ، 30 كۇننەن 60 كۇنگە جەتكىزۋدى ۇسىنامىز. نەمەسە كانديدات پرەزيدەنت سايلاۋىنا ءتۇسۋدى جوسپارلاعان كانديداتتار تىم ەرتەدەن ساياساتپەن اينالىسىپ، سايلاۋشىلاردىڭ نازارىن وزدەرىنە اۋدارۋى كەرەك. كەشە ءبىر ۋنيۆەرسيتەتتەن قاتىسقان بايقاۋشى بويجەتكەن ا ق ش- تاعى سەناتورلار، ساياساتكەرلەر كەلەسى سايلاۋعا دايىندىقتى كەشە بولعان سايلاۋدىڭ ەرتەڭىندە باستاپ كەتەتىنىن ايتتى. ال قازاقستاننىڭ ۇمىتكەرلەرى سايلاۋعا 30 كۇن قالعاندا ۇگىتتى باستايتىنىن ايتىپ، سالىستىردى. ال كەلەسى سايلاۋعا دەيىن بۇگىنگى كانديداتتار قايتادان ءۇنسىز قالۋى مۇمكىن دەگەن بولجامىن جەتكىزدى. كەلەسى سايلاۋدا تاعى جاڭا ەسىمدەر شىعۋى ىقتيمال»، - دەپ تۇيىندەدى عالىم.

ايتا كەتەيىك، ورتالىق سايلاۋ كوميسسياسى پرەزيدەنت سايلاۋىنىڭ الدىن الا ناتيجەسىن جاريالاعان بولاتىن.