داۋىس بەرگەن قازاقستان جاستارىندا ءۇمىت باسىم بولدى - امەريكالىق بايقاۋشى

استانا. قازاقپارات - حالىقارالىق سالىق جانە ينۆەستيتسيالىق ورتالىقتىڭ پرەزيدەنتى، ا ق ش- تان كەلگەن حالىقارالىق بايقاۋشى دەنيەل ۆيتت قازاقستاندا كەزەكتەن تىس وتكەن پرەزيدەنت سايلاۋىندا جاستاردىڭ ءرولى ەرەكشە بولعانىن اتاپ ءوتتى ، دەپ حابارلايدى قازاقپارات ءتىلشىسى.

«ءبىز 4 سايلاۋ ۋچاسكەسى قالاي جابىلعانىن كوردىك. ءبىز ەركىن، ءادىل سايلاۋعا بايقاۋشى بولدىق. مۇنى حالىقارالىق جانە قازاقستاندىق تاۋەلسىز بايقاۋشىلار دا راستادى. جەرگىلىكتى بايقاۋشىلاردىڭ ورتاشا جاسى 35-تەن كىشى. سەنبى كۇنىندە ءبىز كانديداتتاردىڭ وكىلدەرىمەن كەزدەسىپ، «پروتسەس ءادىل ۇيىمداستىرىلىپ جاتىر ما؟» دەگەن سۇراق قويدىق. ءبارى سەنىمدى تۇردە «ءيا» دەپ جاۋاپ بەردى»، - دەدى ا ق ش بايقاۋشىسى.

سونداي- اق، ول داۋىس بەرۋشىلەرمەن كەرى بايلانىس ورناتۋ ارقىلى جالپى جاعدايعا قانىققاندارىن ايتتى.

«جاس سايلاۋشىلارمەن، ەگدە جاستاعى سايلاۋشىلارمەن سۇحباتتاسىپ، حالىقتىڭ، اسىرەسە جاستاردىڭ، ءۇمىتى باسىم ەكەنىن كوردىك. مەن قازىر جاستارعا باسىمدىق بەرىپ ايتقىم كەلەدى. ياعني، 35-تەن جاس ادامدار تۋرالى ايتىپ وتىرمىن. ولار تۇراقتىلىق، قاۋىپسىزدىك جانە تاۋەلسىزدىك دەگەن ۇعىمدى وزدىگىنەن بولاتىن يگىلىك دەپ قابىلدامايدى. مەنىڭشە، قاڭتاردىڭ قايعىلى وقيعاسى وسىنى جاقسى كورسەتكەن سياقتى. جالپى وڭىردەگى جاعدايدى ەسكەرسەك، مۇنىڭ ءبارى تۇسىنىكتى. كەشە ولار ءوز داۋىستارىن ۇمىتكە بەردى. بۇل سايلاۋ قورىتىندىسىمەن دە ۇندەسەدى. ويكەنى، بۇل - ۇمىتكە بەرىلگەن داۋىس، پرەزيدەنت ق. توقايەۆتىڭ ءوز ۋادەسىن ورىنداي الادى جانە دەموكراتيالىق رەفورمالاردى جالعاستىرادى دەگەن ۇمىتكە بەرىلگەن داۋىس. ءبىز كەشە دەموكراتيا جولىنداعى، دەموكراتياعا جول العان شەشىمتال قادام جاسالدى دەپ ەسەپتەيمىز. مەنىڭ ارىپتەستەرىم وسىعان كەلىسەدى دەپ ويلايمىن»، - دەدى دەنيەلل ۆيتت.

اۆتور

ەسىمجان ناقتىباي