حالىقارالىق بايقاۋشى: قازاقستاندىقتار ەرىكتى تۇردە داۋىس بەرىپ جاتىر

استانا. قازاقپارات - پالەستينا مەملەكەتىنىڭ قازاقستانداعى توتەنشە جانە وكىلەتتى ەلشىسى، قازاقستانداعى تىركەلگەن ديپلوماتيالىق كورپۋستىڭ دۋايەنى مونتاسەر ابۋ زەيد كەزەكتەن تىس پرەزيدەنت سايلاۋىنىڭ ۇيىمداستىرىلۋى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىز تاڭنان بەرى 13 ۋچاسكەگە بارىپ شىقتىق جانە داۋىس بەرۋ پروتسەسى وتە جاقسى، جوعارى دەڭگەيدە ۇيىمداستىرىلعانىن كوردىك. ەشقانداي زاڭسىزدىق بايقاعان جوقپىز. ادامدار جاقسى كوڭىل كۇيمەن، ەرىكتى تۇردە، ەشبىر قىسىمسىز داۋىس بەرىپ جاتىر. جەرگىلىكتى بايقاۋشىلاردان ەشقانداي شاعىم العان جوقپىز»، - دەدى حالىقارالىق بايقاۋشى.

ايتۋىنشا، ول وسىمەن ءۇشىنشى رەت قازاقستاندىقتاردىڭ داۋىس بەرۋ پروتسەسىنە بايقاۋشى رەتىندە قاتىسىپ وتىر.

«مەن قازاقستاندا وسىمەن ءتورتىنشى رەت پرەزيدەنت جانە پارلامەنت سايلاۋىندا، رەفەرەندۋمدا حالىقارالىق باقىلاۋشى رەتىندە قاتىسىپ وتىرمىن. قازاقستان حالقىن قازىر ەلدە جۇرگىزىلىپ جاتقان تابىستى ەكونوميكالىق جانە ساياسي رەفمورمالارمەن قۇتتىقتاعىم كەلەدى. سونداي-اق، قازاقستانعا بەيبىتشىلىك، گۇلدەنۋ جانە قاۋىپسىزدىك تىلەيمىن»، - دەدى ەلشى.

بۇگىن ەلىمىزدەگى 86 ۋچاسكەدە داۋىس بەرۋ وزگە ۋچاسكەلەردەن 1 ساعات بۇرىن باستالدى.

ورتالىق سايلاۋ كوميسسياسىنىڭ بەرگەن مالىمەتىنە سۇيەنسەك، ەلىمىزدە داۋىس بەرۋ قۇقىعى بار 11827277 ازامات تىركەلگەن. ولار رەسپۋبليكا اۋماعىندا ورنالاسقان 10101 سايلاۋ ۋچاسكەسىندە داۋىس بەرەدى. ال 53 شەت مەملەكەتتەگى 68 ۋچاسكەدە 12527 قازاقستان ازاماتىنا داۋىس بەرۋ مۇمكىندىگى جاسالعان.

بۇعان دەيىن و س ك كەزەكتەن تىس پرەزيدەنت سايلاۋىنىڭ بارىسىن 641 حالىقارالىق بايقاۋشى قاداعالايتىنىن ءمالىم ەتكەن ەدى.