تەننيستەن قازاقستان ايەلدەر قۇراماسى الەمدىك رەيتينگىدە ۇزدىك وندىقتا تۇر

استانا. قازاقپارات - حالىقارالىق تەننيس فەدەراتسياسى قۇراما كوماندالاردىڭ جاڭارتىلعان رەيتينگىسىن جاريا ەتتى، دەپ حابارلايدى قازاقپارات ءتىلشىسى.

قازاقستان تەننيس فەدەراتسياسىنان ءمالىم ەتكەنىندەي، ۇلتتىق ايەلدەر قۇراماسى الەمدىك رەيتينگىدە 9 دان 10-ورىنعا سىرعىعانىمەن، ۇزدىك وندىقتا قالدى.

قازاقستان ايەلدەر قۇراماسى رەسەي، يتاليا، رۋمىنيا، بەلگيا، ۇلى بريتانيا، پولشا سىندى ەلدەردىڭ الدىندا تۇر.

قازاقستاندىق قىزدار كوماندالىق الەم چەمپيوناتى - بيللي دجين كينگ كۋبوگىنىڭ فينالدىق كەزەڭىندە ونەر كورسەتىپ، ۇلى بريتانيانى ۇتقانىمەن، يسپانياعا جول بەرىپ، توپتان شىعا الماي قالعان بولاتىن.

رەيتينگ كوشىن بۇرىنعىشا اۋستراليا باستاپ كەلەدى.

Billie Jean King Cup رەيتينگىسىنىڭ ۇزدىك وندىعىنا مىنا قۇرامالار كىرەدى:

1. اۋستراليا - 1142؛

2. شۆەيتساريا - 1041؛

3. يسپانيا - 929؛

4. چەحيا - 922؛

5. فرانسيا - 910؛

6. كانادا - 815؛

7. ا ق ش - 793؛

8. سلوۆاكيا - 779؛

9. گەرمانيا - 777؛

10. قازاقستان - 739

ەسكە سالا كەتەيىك، بۇدان بۇرىن ازيا جاس وسپىرىمدەر رەيتينگىسىندە قوس قازاقستاندىق تەننيسشىنىڭ كوش باستاپ تۇرعانىن جازعان بولاتىنبىز.