فۋتبول: مەسسيدىڭ ارگەنتينا قۇراماسىمەن الەم چەمپيونى اتانۋعا سوڭعى مۇمكىندىگى

استانا. قازاقپارات - نەبارى ءۇش كۇننەن كەيىن كاتار مەملەكەتىندە باستالاتىن فۋتبولدان الەم چەمپيوناتىن جانكۇيەرلەر اسىعا كۇتىپ وتىر.

اتالعان دوپ دوداسىندا باق سىنايتىن قۇرامالار وعان دايىندىعىن جۇرگىزۋدە. ءاربىرى جوعارى دەڭگەيدە ويىن كورسەتۋدى الدىنا ماقسات ەتىپ وتىر. ولاردىڭ قاتارىندا س توبىنداعى قۇرامالار بار. قازاقپارات ءتىلشىسى اتالعان توپتىڭ دوپ دوداسىنداعى مۇمكىندىكتەرى جونىندە تارازىلاپ كورگەن ەدى.

الەم چەمپيوناتىندا ارگەنتينا باس جۇلدەدەن نەگىزگى ۇمىتكەر قۇرامالار قاتارىندا سانالادى. ماماندار ونىڭ ەكى سەبەبى بار ەكەنىن ايتادى. العاشقىسى - ليونەل مەسسي. ول فرانسيانىڭ پ س ج كلۋبى ساپىندا جوعارى دەڭگەيدە ويىن ورنەگىن كورسەتىپ ءجۇر. دوپ دوداسىنىڭ ءدۇلدىلى بيىلعى الەم بىرىنشىلىگىندە كۋبوكتى توبەسىنە كوتەرۋدى قالايتىنىن اشىق ايتىپ كەلەدى. بۇگىندە 35 جاستان اسقان مەسسي ءۇشىن بيىلعى ايتۋلى الامان سوڭعى مۋنديال بولۋى مۇمكىن. سوندىقتان ول ءوز قۇراماسىن جەڭىسكە باستاۋعا بار كۇشىن سالاتىنى انىق.

ەكىنشى سەبەپ - باس باپكەر ليونەل سكالونيدىڭ جەڭىلىسسىز ساتتىلىك سەرياسى. ۇلتتىق قۇراما تىزگىنىن ۇستاعان ونىڭ شاكىرتتەرى 35 ويىننان بەرى ەشكىمگە جەڭىلگەن جوق. سوڭعى مارتە ارگەنتينا 2019-جىلدىڭ ماۋسىم ايىندا قارسىلاسىنا ەسە جىبەرىپ قويعان ەدى. سودان بەرى وڭتۇستىك امەريكا كۋبوگىن يەلەنىپ ۇلگەردى. ەندىگى ماقسات - الەم چەمپيوناتى.

ساۋد ارابياسى

ساۋد ارابياسى 2018-جىلى رەسەيدە وتكەن الەم چەمپيوناتىندا ورتا دەڭگەيدە ويىن كورسەتتى. الاڭ يەلەرى - رەسەيگە 0:5 ەسەبىمەن جول بەردى. ال ۋرۋگۆايعا 0:1 ەسەبىمەن جەڭىلىپ، ەگيپەتتەن 2:1 ەسەبىمەن باسىم ءتۇستى.

دەگەنمەن ماماندار باس باپكەر ەرۆە رەنار جەتەكشىلىك جاسايتىن قۇراما ءوز دەڭگەيىندە ەمەس دەگەندى كولدەنەڭ تارتادى. سوڭعى سەگىز ويىننىڭ نەبارى ەكەۋىندە جەڭىسكە جەتتى. دوپ دوداسىندا توپتاعى قارسىلاسىنىڭ بارلىعى ولاردان مىقتى. قۇراما ساپىنداعى فۋتبولشىلاردىڭ بارلىعى - ءوز مانسابىن اياقتاۋعا جاقىنداپ قالعان جاستاعى جىگىتتەر. سوندىقتان ماماندار ولاردى توپتىق كەزەڭدە ۇپاي الا الماۋى دا مۇمكىن دەگەن بولجام ايتادى.

مەكسيكا

مەكسيكا قۇراماسىنىڭ كوشباسشىسى حەسۋس كورونا تامىز ايىندا اۋىر جاراقات الىپ قالدى. سوعان بايلانىستى ول الەم چەمپيوناتىنا قاتىسا المايدى. دەسە دە قۇرامادا شابۋىل شەبىندە ودان وزگە دە تاجىريبەلى ويىنشىلار بار. ماسەلەن، راۋل حيمەنەس پەن يرۆينگ لوسانو جاسىل الاڭ تورىندە جارقىلداپ كوزگە ءتۇسىپ ءجۇر. باس باپكەر حەراردو مارتينو نەگىزىنەن گيلەرمو وچوا سىندى تاجىريبەلى قاقپاشىعا ۇلكەن ءۇمىت ارتادى.

كەيىنگى جەتى الەم چەمپيوناتىندا مەكسيكا تۇراقتى تۇردە 1/8 فينالعا شىقتى. الايدا، ودان جوعارى ناتيجەگە قول جەتكىزە الماي كەلەدى. بيىل دا سول ۇردىستەن جاڭىلماي ما؟ ول ءۇشىن الدىمەن توپتىق كەزەڭنەن ىركىلمەي ءوتۋى ءتيىس.

پولشا

اتالعان توپتاعى پولشا قۇراماسى الەم چەمپيوناتىنا جولداماعا سوڭعى ساتتە قول جەتكىزدى. دوپ دوداسىنا ىرىكتەۋ ساتىسىنداعى وتپەلى ويىندا شۆەتسيانى ارتقا قالدىرعان ولار ەندى قانداي دەڭگەيدە شەبەرلىگىن كورسەتە الادى؟

قۇراما ساپىندا 34 جاستاعى روبەرت ليەۆاندوۆسكي بار. بۇگىندە يسپانيانىڭ «بارسەلونا» كومانداسىن ورگە سۇيرەپ جۇرگەن ول سول شەبەرلىگىن قاتار جەرىندە قانشالىقتى پاش ەتە الادى؟ ول ءوزىن جاقسى قىرىنان تانىتۋعا كۇش سالۋى ءتيىس. ول 2026-جىلعى الەم چەمپيوناتىنا بارا الماۋى ابدەن مۇمكىن. سوندىقتان اتالعان شابۋىلشى ءوز قۇراماسىنىڭ كەم دەگەندە توپتىق كەزەڭنەن وتۋىنە بارىن سالادى.

س توبىنداعى ويىندار كەستەسى:

22- قاراشا

ارگەنتينا - ساۋد اراۆياسى

مەكسيكا - پولشا

26- قاراشا

پولشا - ساۋد ارابياسى

ارگەنتينا - مەكسيكا

30- قاراشا

پولشا - ارگەنتينا

ساۋد ارابياسى - مەكسيكا

ەسكە سالساق، بۇدان بۇرىن ا توبىنداعى قۇرامالار جونىندە جازىلعان ەدى.

سونداي-اق، ۆ توبىنداعى قۇرامالار جونىندە حابارلانعان بولاتىن.