اسحات ايماعامبەتوۆ ءبىلىم باسقارمالارىنىڭ شىندىقتان الشاق ەسەبىنە كەيىس ءبىلدىردى

سەمەي. قازاقپارات - وقۋ- اعارتۋ ءمينيسترى اسحات ايماعامبەتوۆ مەكتەپ كىتاپحانالارىنىڭ قورى تولىقتىرىلىپ وتىراتىنى تۋرالى ءبىلىم باسقارمالارىنىڭ شىندىققا سايكەس كەلمەيتىن ەسەبىنە كەيىستىك تانىتتى، دەپ حابارلايدى قازاقپارات.

ا. ايماعامبەتوۆ اباي وبلىسىنا ساپارى بارىسىندا پريرەچنوە اۋىلىنداعى مەكتەپتە بولدى. وندا كىتاپحاناشى كوركەم ادەبيەتتەر جەتكىلىكسىز مولشەردە ساتىپ الىناتىنىن جەتكىزگەن.

«مەكتەپ كىتاپحاناسىنىڭ جۇمىسى لايىقتى دەڭگەيدە ەمەس. كىتاپحاناشى كوركەم ادەبيەتتەر جەتكىلىكسىز مولشەردە ساتىپ الىناتىنىن ايتتى.

الايدا بۇعان دەيىن ءبىلىم باسقارمالارى جىل سايىن كىتاپ قورى تولىقتىرىلاتىنى تۋرالى ەسەپ بەرگەن ەدى. «وقۋعا قۇشتار مەكتەپ» جوباسى ءتيىستى دەڭگەيدە جۇزەگە اسىرىلماي جاتىر.

وبلىستىڭ ءبىلىم باسقارماسى باسشىلىعىنا بارلىق ەسكەرتۋدى جويۋ تاپسىرىلدى»، - دەپ جازدى مينيستر Facebook-تە.

اتالعان ءبىلىم ورداسىندا 237 بالا وقيدى. ۆەدومستۆو باسشىسى پەداگوگتەرمەن وقۋ باعدارلامالارى، بالالارمەن جۇمىس، باعالاۋ جانە وزگە دە ماسەلەلەردى تالقىلادى. وقۋشىلارمەن سويلەسىپ، ۇ ب ت- عا دايىندىق، ماماندىق تاڭداۋ، كىتاپ وقۋ، دەبات قوزعالىسى جانە مەكتەپ پارلامەنتتەرى تاقىرىپتارىندا اڭگىمەلەستى.

«وبلىستىڭ بولىنۋىنە بايلانىستى مەكتەپتەردىڭ جوندەۋ جۇمىستارى مەن ماتەريالدىق- تەحنيكالىق جابدىقتالۋ ماسەلەلەرى شەشىمىن تاباتىنىنا سەنەمىن. وبلىس باسشىلىعىنىڭ بارلىق تۇيىتكىلدى ماسەلەنى شەشۋ بويىنشا ناقتى كوزقاراسى بار ەكەنى بايقالادى.

سونىمەن بىرگە اباي وبلىسىنداعى مەكتەپتەر قۇرىلىسىنىڭ دايىندىق جۇمىستارىمەن تانىستىم. «جايلى مەكتەپ» ۇلتتىق جوباسى اياسىندا وبلىستا 12 مىڭعا جۋىق وقۋشىعا ەسەپتەلگەن 11 مەكتەپ (6 مەكتەپ سەمەي قالاسىندا جانە 5-ەۋى اۋىلدا) سالۋ جوسپارلانىپ وتىر.

قازىر اكىمدىك بۇل باعىتتاعى جۇمىستى جوعارى دەڭگەيدە ۇيىمداستىردى. بۇل ينجەنەرلىك- كوممۋنيكاتسيالىق ينفراقۇرىلىم ماسەلەلەرى، باستاپقى رۇقساتتاردى بەكىتۋ جانە تاعى باسقاسى»، - دەدى ا. ايماعامبەتوۆ.

رەداكتور

گۇلميرا الياكپاروۆا