الماتىدا بايتۇرسىن ۇلىنىڭ مۋزەي ءۇيى كۇردەلى جوندەۋدەن كەيىن اشىلدى

الماتى. قازاقپارات - الماتىدا احمەت بايتۇرسىن ۇلىنىڭ مۋزەي-ءۇيى رەەكسپوزيتسيادان كەيىن اشىلدى، دەپ حابارلايدى قازاقپارات ءتىلشىسى.

«بيىل ۇلت ۇستازى، مەملەكەت جانە قوعام قايراتكەرى، عالىم- رەفورماتور - احمەت بايتۇرسىن ۇلىنىڭ تۋعانىنا 150 جىل تولدى. الماتى قالاسى مادەنيەت باسقارماسىنىڭ قولداۋىمەن احمەت بايتۇرسىن ۇلىنىڭ مۋزەي-ۇيىنە كۇردەلى جوندەۋ جۇرگىزىلىپ، ەكسپوزيتسياسى جاڭارتىلدى»، - دەلىنگەن «الماتى قالاسى مۋزەيلەر بىرلەستىگى» ك م ق ك تاراتقان حابارلامادا.

ⅩⅩ عاسىردىڭ ۇلى رەفورماتورى، قوعام جانە مەملەكەت قايراتكەرى، لينگۆيست-عالىم، قازاق فيلولوگيا عىلىمىنىڭ نەگىزىن قالاۋشى، اقىن-اۋدارماشى، تۇركىتانۋشى احمەت بايتۇرسىن ۇلىنىڭ مۋزەي-ءۇيى 1993-جىلى اشىلعان. مۋزەي-ءۇيدىڭ جانىنداعى بايتۇرسىن ۇلىنىڭ بيۋستى 1998-جىلى ورناتىلعان.

«الماتى قالاسى اكىمىنىڭ 2021-جىلعى 13- قازانداعى 4/508№ قاۋلىسىمەن مۋزەي-ءۇي جەكەمەنشىكتەن الماتى قالاسىنىڭ كوممۋنالدىق مەنشىگىنە بەرىلدى. جاڭارعان مۋزەي-ءۇي 3 ەكسپوزيتسيالىق جانە ءبىر ءدارىس زالىنان تۇرادى. قازىرگى ۋاقىتتا مۋزەيدە عالىمنىڭ ءومىرى مەن شىعارماشىلىعى تۋرالى 500 گە جۋىق ەكسپونات جيناقتالعان. بۇل - مەملەكەتتىك ارحيۆتەن الىنعان ءتۇپ نۇسقا قۇجاتتار، جەكە جانە ۇجىمدىق فوتوسۋرەتتەر»، - دەلىنگەن حابارلامادا.

«الماتى قالاسى مۋزەيلەر بىرلەستىگى» ك م ق ك مالىمەتىنشە، مۋزەي زاماناۋي تەحنولوگيالارمەن جابدىقتالىپ، جاڭا مازمۇنمەن تولتىرىلىپ، جاڭا سيپات الدى.

ارنايى سەنسورلى تاقتالاردا مۋزەي-ءۇيدىڭ قۇرىلۋ تاريحى، ارحيۆ ماتەريالدارى، فوتوسۋرەتتەر جانە رەفورماتوردىڭ ءومىرى مەن شىعارماشىلىق جولى تۋرالى مول ماعلۇمات بەرەتىن قۇندى مالىمەتتەر بار.

ايتا كەتەيىك، بۇگىن پرەزيدەنت الماتىدا احمەت بايتۇرسىن ۇلىنا ارنالعان ەسكەرتكىشتى اشتى.

بۇعان دەيىن الماتىدا احمەت بايتۇرسىن ۇلىنىڭ 12 تومدىق شىعارمالار جيناعى جارىققا شىققان بولاتىن.