08:25, 11 - قاراشا 2022 | GMT +6
وسكەمەن- التاي تاسجولىندا كولىك قوزعالىسى شەكتەلدى
وسكەمەن. قازاقپارات - شىعىس قازاقستان وبلىسىنداعى «وسكەمەن- التاي» تاسجولىندا كولىك قوزعالىسى شەكتەلدى، دەپ حابارلايدى قازاقپارات ءتىلشىسى.
شقو توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وڭىردەگى تاسجولداردىڭ بىرىندە كولىك قوزعالىسى شەكتەلدى.
«وسكەمەن- التاي- ۇلكەن نارىن- كاتونقاراعاي- راحمان قاينارلارى» تاسجولىنىڭ 6 دان 66 شاقىرىمعا دەيىنگى ۋچاسكەسىندە تىركەمەسى جانە جارتىلاي تىركەمەسى بار كولىكتەردىڭ قوزعالىسىنا تىيىم سالىندى. جولدا ءتيىستى بەلگىلەر ورناتىلعان. شەكتەۋ قىس مەزگىلىنىڭ سوڭىنا دەيىن ساقتالادى»، - دەلىنگەن اقپاراتتا.
وسى رەتتە، دەپارتامەنت ماماندارى وبلىس تۇرعىندارىنا قولايسىز اۋا رايىندا الىس ساپارعا شىقپاۋعا، جولداردىڭ جاي-كۇيىن «دارمەن» ءموبيلدى قوسىمشاسى ارقىلى تەكسەرىپ وتىرۋعا كەڭەس بەردى.
