حالىقارالىق وليمپيادا جەڭىمپازدارى ەمتيحاننان بوساتىلۋى مۇمكىن - مينيسترلىك
ۆەدومستۆو «التىن بەلگى» بەرۋ تۋرالى قولدانىستاعى بۇيرىققا وزگەرىستەر ەنگىزۋگە باستاما جاسادى. بيىلعى وقۋ جىلىنان باستاپ جالپى ءبىلىم بەرەتىن پاندەر بويىنشا ۇزدىك وقۋشىلار جانە سوڭعى ءۇش جىل بويى حالىقارالىق وليمپيادالاردىڭ جەڭىمپازى اتانعان «التىن بەلگى» توسبەلگىسىنە ۇمىتكەرلەر قاجەت بولعان جاعدايدا قورىتىندى ەمتيحانداردان بوساتىلىپ، ۇزدىك بەلگىسىن الادى.
11-سىنىپ تۇلەكتەرى حالىقارالىق وليمپيادالارعا دايىندالۋ ءۇشىن وقۋ-جاتتىعۋ جيىندارىنا قاتىسقان جاعدايدا قورىتىندى اتتەستاتسيادان بوساتىلۋى مۇمكىن.
«بۇعان دەيىن «التىن بەلگىگە» ۇمىتكەر حالىقارالىق وليمپيادالاردىڭ جەڭىمپازدارى قورىتىندى اتتەستاتسيا كەزىندە جازعى وقۋ-جاتتىعۋ جيىندارىندا بولىپ، حالىقارالىق وليمپيادالار مەن جارىستارعا دايىندالىپ، ەمتيحان تاپسىرا الماسا، اۆتوماتتى تۇردە «التىن بەلگى» بەلگىسىنەن ايىرىلاتىن. ەندى تۇلەكتەر ونى الا الادى. ول ءۇشىن «ۇزدىك» دەگەن باعا بولۋى كەرەك. قازىر دارىندى بالالاردى قولداۋ ماقساتىندا جان-جاقتى جۇمىستار اتقارىلىپ جاتىر. بۇل وزگەرىس تە بالالاردىڭ مۇددەسى ءۇشىن قابىلداندى»، - دەپ ءتۇسىندىردى وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
