كوزىلدىرىك تاعۋ كورۋدى ناشارلاتا ما - وفتالمولوگ جاۋابى
دارىگەر ادامنىڭ كورۋ قابىلەتى ناشار بولعاندىقتان كوزىلدىرىك تاعايىندادى، ءبىراق كەيبىرەۋلەر ونى قانداي دا ءبىر سەبەپپەن مۇلدە كيگىسى كەلمەيدى.
ەگەر كورۋ قابىلەتىڭىز سونشالىقتى ناشار بولماسا كوزىلدىرىك كيمەۋ قاۋىپتى مە؟ كوزىلدىرىكسىز ەشقايدا بارا المايتىنىڭىزدى قالاي تۇسىنۋگە بولادى جانە كوزىلدىرىك كەرىسىنشە كوزگە زيان با؟ وسى سياقتى ماڭىزدى سۇراقتارعا وفتالمولوگ- دارىگەر ەۆگەني گۋرميزوۆ جاۋاپ بەردى.
كورۋ قابىلەتىڭىز ناشارلاعانىن قالاي تۇسىنۋگە بولادى؟
ەۆگەني گۋرميزوۆتىڭ ايتۋىنشا، وفتالمولوگقا بارماي-اق، كوزدىڭ كورۋ قابىلەتىن تەكسەرەتىن بىرنەشە جول بار.
«كوزدىڭ ناشارلاپ بارا جاتقانى كۇندەلىكتى ومىردە كورىنەدى. مىسالى، كومپيۋتەردە جۇمىس ىستەگەندە، اسىرەسە ارىپتەردى كورۋ ءۇشىن مونيتورعا جاقىندايسىز. سمارتفوندى پايدالانعان كەزدە ەكرانداعى ارىپتەر بۇلىڭعىر بولسا، تەلەفوندى كوزگە جاقىنداتىپ نەمەسە الىستاتۋ قاجەتتىلىگى تۋىندايدى. مۇنىڭ ءبارى ادام كوزىنىڭ ناشارلاپ بارا جاتقانىن بىلدىرەدى»، - دەيدى ول.
باسقا جالپى بەلگىلەر:
• ىمىرتتا بۇلىڭعىر كورۋ؛
• شارشاعان كەزدە باس اۋرۋى (مىسالى، مونيتوردا وتكىزىلگەن ۇزاق جۇمىس كۇنىنەن كەيىن)؛
• بەينەلەردىڭ بۇلدىراپ ەكەۋ بوپ كورىنۋى.
كوزىڭىزدە بىردەڭە دۇرىس ەمەس ەكەنىن ءتۇسىندىڭىز دەلىك، دارىگەرگە جازىلدىڭىز جانە سىزگە كوزىلدىرىك نەمەسە لينزا قاجەت ەكەنىن ءبىلدىڭىز. بۇلاردىڭ قايسىسى جاقسى؟ گۋرميزوۆ ولاردىڭ اراسىندا دەنساۋلىق ءۇشىن ەشقانداي ايىرماشىلىق جوق ەكەنىن ايتادى.
«كوزىلدىرىك تە، لينزالار دا وپتيكالىق انوماليالاردى تۇزەتۋدىڭ ءتيىمدى جانە قاۋىپسىز ادىستەرى. ماسەلە نەنىڭ جاقسى نەمەسە ناشار ەكەنىندە ەمەس، ناقتى ادام ءۇشىن قاي ءتۇرى قولايلى ەكەنىن ءتۇسىنىپ الۋ كەرەك. كەيبىر ادامدار كوزىلدىرىك كيۋدى ىڭعايسىز دەپ سانايدى، ال باسقالارى لينزالاردى كيۋدى قيىن دەيدى. بارلىعى جەكە وزىڭىزگە بايلانىستى»، - دەيدى وفتالمولوگ.
كورۋدى تۇزەتۋدىڭ قاي ءادىسى سىزگە سايكەس كەلەتىنىن ءتۇسىنۋ ءۇشىن وفتالمولوگپەن بايلانىسىڭىز، كەشەندى دياگنوستيكادان ءوتىپ، ءومىر سالتىڭىزدى تالداڭىز. ەگەر ءسىز سپورتپەن كوپ اينالىسساڭىز، كوزىلدىرىك كيۋ وتە ىڭعايلى بولماۋى مۇمكىن. نەمەسە كونتاكتىلى لينزالاردى كۇنىنە 10 ساعاتتان ارتىق تاعىپ جۇرسەڭىز، كۇننىڭ سوڭىنا قاراي ىڭعايسىزدىقتى سەزىنۋىڭىز مۇمكىن.
كوزىلدىرىك تاقپاسا نە بولادى؟
دارىگەر بۇل جاعداي كوزدىڭ كورى قابىلەتى ناشارلاي تۇسەتىنىن ايتادى.
«كوزىلدىرىكتى جانە كونتاكتىلى لينزانى ميوپيانىڭ، گيپەرمەتروپيانىڭ نەمەسە استيگماتيزمنىڭ دارەجەسى بويىنشا كيۋگە شەكتەۋلەر جوق. ەگەر مينۋس 0,5 كورۋ قابىلەتى بار ادام ىڭعايسىزدىقتى سەزىنسە، وندا ول كوزىلدىرىك نەمەسە لينزالاردى تاڭداۋ ءۇشىن وفتالمولوگپەن بايلانىسا الادى. سونىمەن قاتار، تۇزەتكىش وپتيكادان باس تارتۋ، ءتىپتى كوز سونشالىقتى ناشار كورمەسە دە، ءارتۇرلى قاشىقتىقتا كورۋدى شوعىرلاندىرۋعا جاۋاپ بەرەتىن تسيليارلى بۇلشىقەتتىڭ شامادان تىس كەرنەۋىنە بايلانىستى كورۋ قابىلەتىنىڭ ودان دا ۇلكەن بۇزىلۋىنا اكەلۋى مۇمكىن»، - دەيدى دارىگەر.
وفتالمولوگ كوزى ناشار كورەتىن بالالاردىڭ كوزىلدىرىك تاقپاۋىنىڭ سالدارىن دا ءتۇسىندىردى.
«ەگەر بالالار وفتالمولوگى بالاعا كوزىلدىرىك جازىپ بەرگەن بولسا، ءبىراق ول كوزىلدىرىكتى تاقپاسا، بينوكۋليارلى كورۋ قابىلەتىنىڭ قالىپتاسۋىندا پروبلەمالار بولۋى مۇمكىن. بۇل ميدىڭ ەكى سۋرەتتى ءبىرتۇتاس ايقىن سۋرەتكە بىرىكتىرۋ قابىلەتى»، - دەيدى ول.
ەگەر دارىگەر سىزگە تەك «قاشىقتىققا» نەمەسە «وقۋ ءۇشىن» كوزىلدىرىك تاعايىنداعان بولسا، وپتيكانى ۇنەمى پايدالانۋدىڭ قاجەتى جوق.
كوزىلدىرىك زيان بولۋى مۇمكىن بە؟
«كوزىلدىرىك كيگەندىكتەن كوز «جالقاۋ» بولىپ كەتەدى، سودان كەيىن كورۋ ودان سايىن ناشارلايدى» دەگەنگە سەنەتىندەر بار. دەگەنمەن، دارىگەر بۇل كەڭ تارالعان قاتە پىكىردى جوققا شىعاردى.
«كوز جۇمىس ىستەۋى ءۇشىن ارنايى كوزىلدىرىكتى كوپ تاقپاۋ كەرەك دەگەن تەوريا ميف. كوزىلدىرىكتى ۇنەمى كيۋدىڭ سالدارىنان كورۋ ناشارلايتىنىن دالەلدەيتىن بىردە-ءبىر راستالعان زەرتتەۋ جوق. كوزىلدىرىك پەن لينزالار كوزى ناشار كورەتىن ادامنىڭ 100 پايىز دۇرىس كورەتىندەي جاعداي جاسايدى. ءبىز كورۋ جۇيەسىن جاقسى كورۋگە مۇمكىندىك بەرەمىز، كوز تورىنا ناقتى فوكۋستى قامتاماسىز ەتەمىز، وسىلايشا كورۋ جۇيەسى دۇرىس جۇمىس ىستەيدى»، - دەيدى ەۆگەني گۋرميزوۆ.
massaget.kz
