قۇتلىق قاعان بىتىكتاسىنىڭ تابىلۋى الەم عىلىمىنداعى ماڭىزدى وقيعاعا بالانۋدا
تۇركى اكادەمياسىنان ءمالىم ەتكەندەي، حاتتا قۇتلىق قاعان ەسكەرتكىشىنىڭ تابىلۋى «دۇنيەءجۇزى عىلىمىندا ماڭىزدى وقيعا سانالاتىنى» اتاپ وتىلگەن سونىمەن قاتار، مۇنداي ماڭىزدى جاڭالىقتىڭ تۇركولوگيانىڭ دامۋىنا ايرىقشا سەرپىن بەرەتىنى ايتىلعان.
«سىزدەردى جەكە ءوزىمنىڭ جانە م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ازيا جانە افريكا ەلدەرى ينستيتۋتى ۇجىمى اتىنان موڭعوليانىڭ ارحانعاي ايماعىندا تۇركى اكادەمياسىنىڭ ارحەولوگ- ماماندارى اشقان ايرىقشا ماڭىزدى عىلىمي جاڭالىعىمەن شىن جۇرەكتەن قۇتتىقتايمىن. تاريحتا «تۇرك» اتاۋى العاش رەت كەزدەسەتىن ەڭ كونە جازبا ەسكەرتكىشىنىڭ تابىلۋى دۇنيەجۇزى عىلىمىندا ماڭىزدى وقيعا بولىپ سانالادى جانە بۇل تۇركولوگيانىڭ عىلىمي سالا رەتىندە دامۋىنا سونى سەرپىن بەرەدى. سىزگە جانە ءسىزدىڭ ۇجىمعا بۇدان ءارى قاراي دا شىعارماشىلىق تابىس تىلەيمىن. ازيا جانە افريكا ەلدەرى ينستيتۋتى مەن تۇركى اكادەمياسى اراسىندا الداعى ۋاقىتتا تابىستى ارىپتەستىك ورنايتىنىنا سەنەمىن»، - دەلىنگەن دارحان قىدىرالىنىڭ اتىنا كەلگەن قۇتتىقتاۋ حاتتا.
ەسكە سالايىق، بيىل حالىقارالىق تۇركى اكادەمياسى موڭعوليانىڭ ارحەولوگيا ينستيتۋتىمەن بىرلەسىپ ۇيىمداستىرعان عىلىمي ەكسپەديتسياسى ناتيجەسىندە نومعون القابىنان كونە تۇركى داۋىرىنە جاتاتىن بىتىكتاستىڭ جوعارعى بولىگى مەن عۇرىپتىق كەشەنىن تاپقان بولاتىن. ەكسپەديتسيا جۇمىسىنا اكادەميانىڭ عىلىمي قىزمەتكەرلەرى، بەلگىلى تۇركولوگ ءناپىل بازىلحان مەن نۇربولات بوگەنبايەۆ قاتىستى. تۇركى اكادەمياسىنىڭ عالىمدارى ەسكەرتكىشكە قاشالعان جازۋلاردى وقىپ، ونىڭ ەكىنشى تۇركى قاعاندىعىن قۇرعان قۇتلىق قاعانعا ارنالعانىن انىقتاپ وتىر.
