سوڭعى ۋاقىتتا ومىرتقا اۋرۋىنا جاستار ءجيى شالدىعادى
اسىرەسە، سكوليوزعا شالدىققان جەتكىنشەكتەر كوپ. دارىگەرلەر بۇل اۋرۋعا بەيجاي قاراماي، ەرتەرەك الدىن الۋ قاجەتتىگىن ايتادى.
«جالپى ومىرتقا اۋرۋلارىنىڭ 52 ءتۇرى بار»، - دەيدى ماماندار. دەنى جۇلىن مەن جۇيكە تامىرلارى ومىرتقا اراسىندا قىسىلعان كەزدە بىردەن بايقالادى ەكەن. سالدارىنان ادامنىڭ بەلى، اياق- قولى، باسى، ءتىپتى ىشكى اعزالارىنىڭ اۋىرۋ ۇدەي تۇسەدى. بۇعان ءتۇرلى فاكتورلار اسەر ەتۋى مۇمكىن. كومپيۋتەر الدىندا ۇزاق وتىرۋ، اۋىر جۇك كوتەرۋ دە ومىرتقا اۋرۋىنا اكەپ سوعادى. ال قازىر بالالار اراسىندا سكوليوز اۋرۋى كوبەيگەن. اۋىر سومكە ارقالاپ نەمەسە ءتۇرلى گادجەتتەرگە تەلمىرۋدىڭ سالدارى ومىرتقادا جارىقشاعىنا اكەپ سوقتىرادى.
سەرىك اقشالوۆ، وستەوپات دارىگەر:
- كوپ جاعدايدا تۋابىتتى بولادى نەمەسە ءبىر جاراقات الىپ قالادى، سول كەزدە ومىرتقامىز قاتايىپ قالۋى مۇمكىن. ونىڭ ۇستىنە اۋىر جۇمىس بار، كىشكەنتاي بالالار اۋىر سومكە كيەدى. مۇمكىندىگىنشە بالانى كىشكەنتاي كەزدەن قاراپ، ومىرتقاسى قيسايعان بولسا، ورنىنا كەلتىرسە، ومىرتقانىڭ قوزعالىس قىزمەتىن جاقسارتساق، ءبارى جاقسى بولادى.
ال ماماندار: «سكوليوزدىڭ اسقىنۋى وتە قاۋىپتى»، - دەپ وتىر. ياعني كەۋدە قۋىسىنىڭ قيسايۋى، جۇرەكتەن تارتىپ، ىشكى اعزالاردىڭ جۇمىسىن ناشارلاتادى. سكوليوز اسقىنعان جاعدايدا تەك وپەراتسيا ارقىلى تۇزەۋگە بولاتىندىعىن ايتادى. ال ونى تۇزەتۋ - ەڭ كۇردەلى وپەراتسيالاردىڭ ءبىرى. ال بۇرىن جاسى 40-50-دەن اسقان ۇلكەن ادامداردا كەزدەسەتىن وستەوحوندروز اۋرۋى دا جاسارا باستاعان.
«كوبىنەسە كەڭسە قىزمەتكەرلەرى مەن جاستاردا مويىن جانە بەل وستەوحوندروزى كەزدەسەدى»، - دەيدى ماماندار.
سوندىقتان دارىگەردىڭ كومەگىمەن قاتار ۇنەمى قوزعالىستا جۇرگەن پايدالى. ال مىنا بىلىكتى مامان ۇسىنعان لايفحاكتى مۇقيات ورىنداساڭىز، اۋرۋدىڭ الدىن الۋعا بولادى.
رازاۋل مانجىگىتوۆا، مەديتسينا عىلىمدارىنىڭ كانديداتى:
- مەن مامان رەتىندە ومىرتقا اۋرۋلارىنىڭ الدىن الاتىن قاراپايىم تاسىلمەن بولىسكىم كەلەدى. ەڭ اۋەلى ول ءۇشىن ەكى ۇلكەن تەننيس دوبىن جاڭا شۇلىققا ورتاسىن تۇيىنشەكتەپ سالامىز. دايىن بولعان كىشكەنتاي جاستىقشانى قاراقۇستىڭ تۇسىنا توسەپ، ءتۇزۋ ءارى قاتتى جەرگە جاتىپ 10 مينۋت دەمالۋ قاجەت. ءدال سونداي جاستىقشانىڭ ەكىنشىسىن قۇيمىشاق تۇسىنا قويسا دا بولادى. سوندا ومىرتقامىز سوزىلىپ، سۇيەكتەردىڭ زات الماسۋى جاقسارا تۇسەدى. دەنىمىز ساۋ بولسىن دەسەك، ومىرتقانى ۇنەمى جاتتىقتىرىپ وتىرۋ قاجەت.
ماماندار وسىلاي دەپ كەڭەس بەرەدى. ارقا بۇلشىقەتتەرىن قاتايتۋ ماڭىزدى. ياعني بۇلشىقەتتەر مىقتى بولسا، ومىرتقاعا تۇسەتىن سالماق تا ازايادى. ومىرتقا ساۋلىعى - جالپى دەننىڭ ساۋلىعى.
