پلانشەتتەر وقۋلىقتاردى الماستىرمايدى، ول قوسىمشا قۇرال بولادى - مينيسترلىك
بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى تاراتقان اقپاراتتا ايتىلعان دەپ حابارلايدى قازاقپارات.
باسپا ءسوز قىزمەتىنىڭ مالىمەتتەرىنە قاراعاندا، بۇعان دەيىن اتا-انالار وقۋشىلاردىڭ سيفرلى ءبىلىم بەرۋ رەسۋرستارىنا، ەلەكتروندى كۇندەلىكتەرگە، ءبىلىم بەرۋ پلاتفورمالارىنا، اسىرەسە اۋىلدىق جەرلەردەگى وقۋشىلاردىڭ تەڭ قولجەتىمدىلىگى جانە ريۋكزاكتاردىڭ اۋىرلىعىنا بايلانىستى بالالاردىڭ دەنەسىنە تۇسەتىن جۇكتەمە ماسەلەسىن كوتەرگەن بولاتىن.
بالالارعا ەلەكتروندى كۇندەلىكتەر، وقۋلىقتار مەن سيفرلى ءبىلىم بەرۋ رەسۋرستارى ورناتىلاتىن پلانشەتتەرمەن قاتار بۇرىنعىداي باسىپ شىعارىلعان وقۋلىقتار دا بەرىلەدى.
وسىلايشا، بالالار سيفرلى ساباقتارعا، جاتتىعۋلارعا جانە تاپسىرمالارعا قوسىمشا قول جەتكىزە الادى. سونىمەن قاتار مەكتەپتە باسپا وقۋلىقتارىن قولدانۋعا، كەيىن ولاردى سول جەردە قالدىرۋعا جانە ءۇي تاپسىرمالارىن ورىنداپ، قوسىمشا ءبىلىم الۋ ءۇشىن ەلەكتروندى قۇرىلعىلاردى قولدانۋعا مۇمكىندىك الادى. ەگەر وقۋشى پلانشەتتى پايدالانعىسى كەلمەسە، وندا ونىڭ باس تارتۋىنا جانە تەك ءداستۇرلى وقۋلىقتاردى پايدالانۋىنا قۇقى بار.
«پلانشەتتەردىڭ كومەگىمەن بالالار سيفرلى ساباقتارعا، جاتتىعۋلار مەن تاپسىرمالارعا قوسىمشا قول جەتكىزە الادى. ينتەرنەتى ناشار وڭىرلەر ءۇشىن جۇكتەلگەن سيفرلى ساباقتاردى، تاپسىرمالاردى، ءبىلىم بەرۋ رەسۋرستارى جانە وقۋلىقتاردى وفلاين پايدالانۋ مۇمكىندىگى بولادى. سيفرلىق دامۋ مينيسترلىگىمەن بىرلەسىپ وقۋشىلاردى ەلەكتروندى قۇرىلعىلارمەن قامتاماسىز ەتۋدى جوسپارلاپ وتىرمىز.
ەگەر قانداي دا ءبىر سەبەپتەرمەن بالا پلانشەتتەردى قولدانعىسى كەلمەسە، وندا ول ادەتتەگىدەي ءداستۇرلى وقۋلىقتاردى جانە ستاتسيونارلىق قۇرىلعىلاردان ءبىلىم بەرۋ رەسۋرستارىن پايدالانا الادى. ياعني پلانشەتتەر وقۋلىقتاردى الماستىرمايدى، بۇل - وقۋدىڭ قوسىمشا رەسۋرسى. تاڭداۋ اتا-انالار مەن وقۋشىلاردىڭ ەنشىسىندە بولادى»، - دەپ ايتتى وقۋ-اعارتۋ ۆيتسە-ءمينيسترى ايبات ءىلياسوۆ.
ايتا كەتەيىك، وسىعان دەيىن ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ۇكىمەتتىڭ وتىرىسىندا ءبىرىنشى سىنىپ وقۋشىلارىنا جالعا پلانشەت بەرۋدى ۇسىنعان بولاتىن. مۇنداعى ماقسات - قازىرگى تاڭدا اتا-انالاردىڭ الاڭداۋشىعىن تۋدىرىپ وتىرعان اۋىر ريۋكزاك ماسەلەسىن شەشۋ جانە مەكتەپتەردەگى سيفرلاندىرۋ دەڭگەيىن ارتتىرۋ بولىپ وتىر.
باعدات مۋسين سونداي-اق وقۋ-اعارتۋ مينيسترلىگىمەن بىرگە، پلانشەتتەرگە قويىلاتىن نەگىزگى تالاپتاردى، ونىڭ ىشىندە ينتەرنەتكە قول جەتكىزۋگە ارنالعان سەنىمدى سايتتار ءتىزىمىن بەكىتۋدى، وقۋشىلارعا پلانشەتتەردى ساتىپ الۋ مەن بەرۋدىڭ جىل سايىنعى مەحانيزمىن انىقتاۋدى ۇسىندى.
