ازيانىڭ ەڭ ۇزدىك ستۋدەنتتەرى ەلوردادا جينالدى

استانا. قازاقپارات – بۇگىندە اقپارات داۋىرىندە دەرەكتەردىڭ قۇندىلىعى مۇنايمەن پارا- پار دەسەك قاتەلەسپەيمىز.

اسىرەسە، قارجى تەحنولوگيالارى (fintech) مەن بيزنەستى باسقارۋدا ولاردىڭ الەۋەتى ودان سايىن ارتا تۇسەدى. دەرەكتەر تۋرالى عىلىم استانادا وتكەن جاستار فورۋمىندا باستى تاقىرىپقا اينالدى. ودان بولەك ءتورت كۇنگە سوزىلعان شارا بارىسىندا شەتەلدىك جانە قازاقستاندىق ستۋدەنتتەر ەكولوگيا، بلوكچەين، جاساندى ينتەللەكت پەن كيبەرقاۋىپسىزدىك جايلى ويلارىن ورتاعا سالدى.

ازيانىڭ بەدەلدى ۋنيۆەرسيتەتتەرىنىڭ ستۋدەنتتەرى العاش رەت استانادا وتكەن فورۋمدا باس قوستى. «مەتا- جىبەك جولىن قۇرۋ: ناقتى جانە ۆيرتۋالدى الەمدە ازيالىق مادەنيەتتەردىڭ ينتەگراتسياسى» تاقىرىبىندا وربىگەن جيىن بارىسىندا 10 عا تارتا ۋنيۆەرسيتەت وكىلدەرى تاجىريبەلەرى مەن بىلىمدەرىمەن الماستى. ولاردىڭ قاتارىندا 27 شەتەلدىك دەلەگاتتار مەن NU ستۋدەنتتەرى بولدى.

«نەگىزگى تاقىرىپ - ادامزاتتىڭ تاۋەكەل ەتۋى قاجەت مەجەگە جەتۋى. قازىرگى كۇنى ءبىز دامۋ جولىمىزدا يگى جەتىستىكتەرگە، جاعىمسىز دۇنيەلەرگە دە قول جەتكىزدىك. جاعىمدى جاعى - ءبىز تەحنولوگيالاردى دامىتىپ قانا قويماي، دەنساۋلىعىمىزدى نىعايتىپ، ءومىر ءسۇرۋ ۇزاقتىعىن ارتتىرا الدىق. ال بۇل ءوز كەزەگىندە وركەنيەتكە جەتەلەيدى. جاعىمسىز تۇسى - ءبىز ادامزاتتى كورگە سۇيرەيتىن مەحانيزمدەردى ويلاپ تاپتىق»، - دەيدى فورۋمنىڭ اشىلۋ سالتاناتىندا ءسوز سويلەگەن NU پرەزيدەنتى شيگەو كاتسۋ.

قازىر الەمدە بولىپ جاتقان جاعداي - وسىنىڭ ايقىن ءبىر كورىنىسى دەگەن ول بولاشاق جاستاردىڭ قولىندا ەكەنىن العا تارتتى.

«ماسەلەن، جاھاندىق جىلىنۋ دا ءبىزدىڭ ارەكەتىمىزدىڭ ناتيجەسى. 2010 جانە 2020 -جىلداردىڭ ۇرپاقتارى وسى ءبىر ماسەلەلەرمەن بەتپە- بەت كەلىپ قويماي، ولاردى شەشىپ، الەمدى جاقسى قىرىنا قاراي وزگەرتۋگە تىرىسۋى قاجەت. دەگەنمەن بۇل تەك بارلىعى بىرىكسە عانا ورىندالاتىن دۇنيە. سوندىقتان مەن جاستار ءبىزدىڭ الەمىمىزدىڭ نەگىزى بولاتىنىنا كامىل سەنەمىن»، - دەيدى شيگەو كاتسۋ.

بۇعان قوسا شەتەلدىك قوناقتار قازاقستاننىڭ مادەني مۇراسىمەن تانىسىپ، ەلوردانىڭ كورىكتى جەرلەرىنە ساياحات جاساپ، بۋرابايدىڭ اسەم تابيعاتىن ارالاپ قايتتى.

«فورۋمنىڭ ارقاسىندا قازاقستان جايلى كوبىرەك ءبىلدىم، سەبەبى مەن بۇعان دەيىن مەملەكەت تۋرالى مۇلدەم ەستىمەگەن ەدىم. NU- دا ءجۇرىپ، ءبىز ەلدىڭ مادەنيەتىمەن تانىسىپ، قازاقتىڭ داستارحانىنان ءدام تاتىپ، حالىقتىڭ مۋزىكالىق ونەرىنە ءتانتى بولدىق. كوپ ادامدار مەنى قازاقتىڭ قىزىنا ۇقساتىپ جاتتى. ءوز باسىم ازيالىق ناسىلدىلەرگە ءتان ەرەكشەلىك بار ەكەنىنە سەنەمىن، ونىڭ ۇستىنە ءبىز ءبىر- بىرىمىزبەن تەز ءتىل تابىسىپ كەتتىك»، - دەيدى چۋلالونگكورن ۋنيۆەرسيتەتىنىڭ (تايلاند) ستۋدەنتى چومچا ماريا تيمپيكا.

ايتا كەتسەك، نازاربايەۆ ۋنيۆەرسيتەتى - ازيا ۋنيۆەرسيتەتتەرى اليانسىنا (AUA) كىرەتىن جالعىز جوو. بۇگىندە اليانستىڭ قۇرامىندا 15 ۋنيۆەرسيتەت بار.