قوسشىدا قوس مەكتەپتىڭ قۇرىلىسى ءجۇرىپ جاتىر

استانا. قازاقپارات - قوسشى قالاسىندا ەكى مەكتەپ سالىنىپ جاتىر. بۇل تۋرالى اقمولا وبلىسى مەن استاناداعى مەكتەپتەر قۇرىلىسىنىڭ بارىسىمەن جانە «جايلى مەكتەپ» جوباسى اياسىندا سالىناتىن نىسانداردى جوبالاۋمەن تانىسقان وقۋ- اعارتۋ ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات.

«قوسشىدا بيىلعى قىركۇيەك ايىندا 1200 ورىندىق مەكتەپ پايدالانۋعا بەرىلدى. قازىر مۇندا تاعى ەكى جاڭا مەكتەپ سالىنىپ جاتىر. ولار 2023 -جىلدىڭ جازىنا دەيىن پايدالانۋعا بەرىلەدى دەپ جوسپارلانىپ وتىر. قۇرىلىس جۇمىستارىمەن تانىستىم. پرەزيدەنتتىڭ تاپسىرماسىمەن ازىرلەنگەن «جايلى مەكتەپ» جوباسى اياسىندا كەلەسى جىلى 11000 ورىندىق تاعى 3 مەكتەپتىڭ قۇرىلىسى باستالادى (ەكى اۋىسىم). بۇل وقۋشىلار ورنىنىڭ جەتىسپەۋشىلىگى ماسەلەسىن تولىعىمەن شەشۋگە مۇمكىندىك بەرەدى»، - دەپ جازادى مينيستر الەۋمەتتىك جەلىدەگى پاراقشاسىندا .

ۆەدومستۆو باسشىسى زاڭدى تۇردە مەكتەپ سالۋ جانە وعان بيۋدجەتتەن قارجى ءبولۋ اكىمدىكتەردىڭ قۇزىرىندا ەكەنىن العا تارتادى.

«ولاردى جوبالاۋ، قۇرىلىس مەكەمەلەرىن تاڭداۋ جۇمىستارىمەن دە جەرگىلىكتى قۇرىلىس باسقارمالارى اينالىسادى. الايدا، بۇل ماسەلەنى باقىلاۋدا ۇستاۋ ماڭىزدى»، - دەيدى اسحات ايماعامبەتوۆ.

سونىمەن بىرگە، 2023 -جىلى «جايلى مەكتەپ» جوباسى اياسىندا تالاپكەر اۋىلىندا 4800 ورىندىق ەكى مەكتەپ، قاجىمۇقان اۋىلىندا 1800 ورىندىق ءبىر مەكتەپ سالۋ جوسپاردا بار (ەكى اۋىسىم).

«بۇل وقۋشى ورنىنىڭ تاپشىلىعى ماسەلەسىن تولىعىمەن شەشەدى. سونىمەن قاتار، ۇركەردەگى №69 مەكتەپ- گيمنازياسىندا دا بولدىم. وقۋ كابينەتتەرىن، پسيحولوگيالىق- پەداگوگيكالىق تۇزەتۋ، روبوتوتەحنيكا كابينەتتەرىن ارالاپ شىقتىم. مۇعالىمدەرمەن اڭگىمەلەستىم. بۇل مەكتەپتە 28 بالا ينكليۋزيۆتى ءبىلىم الادى. مەكتەپ ءۇش اۋىسىمدى. وعان جاقىن جەردەن 2023 -جىلى «جايلى مەكتەپ» اياسىندا 2000 ورىندىق جاڭا مەكتەپتىڭ قۇرىلىسى باستالادى»، - دەپ اتاپ وتەدى مينيستر.

رەداكتور

گۇلنۇر عازيز قىزى