قاسىم-جومارت توقايەۆ قىرعىزستاننىڭ قازاقستانداعى مادەنيەت كۇندەرىنىڭ اشىلۋ شاراسىنا قاتىستى

استانا. قازاقپارات - مەملەكەت باسشىسى قاسىم-جومارت توقايەۆ قىرعىزستان پرەزيدەنتى سادىر جاپاروۆپەن جانە ەۋروپالىق كەڭەس پرەزيدەنتى شارل ميشەلمەن بىرگە قىرعىزستاننىڭ قازاقستانداعى مادەنيەت كۇندەرىنىڭ رەسمي اشىلۋ شاراسىنا قاتىستى، دەپ حابارلايدى اقوردانىڭ باسپا ءسوز قىزمەتى.

پرەزيدەنتتەر قىرعىزستاننىڭ ۇلتتىق تاريحي مۇراجايىنىڭ كوللەكسياسى قويىلعان «ىقىلىم مۇراسى» كورمەسىمەن تانىستى. سودان سوڭ قىرعىزستاندىق ونەر شەبەرلەرىنىڭ كونسەرتىن تاماشالادى.

كونسەرت باعدارلاماسى اياسىندا «ماناس» ەپوسىنان ءۇزىندى وقىلىپ، حالىق اقىنى توقتوعۇل ساتىلعانوۆتىڭ ساناتتارى (ديداكتيكالىق ولەڭدەرى) ورىندالدى. سونداي-اق حالىق جازۋشىسى شىڭعىس ايتماتوۆتىڭ شىعارمالارىنان ۇزىندىلەر قويىلدى.

سونىمەن قاتار قازاق جانە قىرعىز حالىقتارىنىڭ باۋىرلاستىعىن دارىپتەۋ ماقساتىندا قىرعىز ونەرپازدارى شوقان ءۋاليحانوۆ، اباي قۇنانبايەۆ، جامبىل جابايەۆ، مۇحتار اۋەزوۆ سياقتى تۇلعالارىمىزدىڭ بەينەسىن سومداپ، ەكى حالىققا كەڭ تاراعان ءان-كۇيلەردى ورىندادى.