رەسپۋبليكالىق قوعامدىق شتابتىڭ مۇشەلەرى سايلاۋشىلارمەن كەزدەستى

استانا. قازاقپارات - بۇگىن ق ر پرەزيدەنتتىگىنە كانديدات قاسىم-جومارت توقايەۆتى قولداۋ جونىندەگى رەسپۋبليكالىق قوعامدىق شتاب مۇشەلەرى، حالىقتىق كواليتسيانىڭ بەلسەندىلەرى ەلىمىزدىڭ بارلىق وڭىرىندە سايلاۋشىلارمەن ەكسپرومت-كەزدەسۋلەر وتكىزدى.

بۇل تۋرالى قازاقپارات حالىقتىق كواليتسيانىڭ باسپا ءسوز قىزمەتىنە سىلتەمە جاساپ حابارلايدى.

ەلورداداعى «كەرۋەن» ساۋدا ويىن-ساۋىق ورتالىعىندا سايلاۋشىلارمەن ەكسپرومت-كەزدەسۋ ءوتتى.

«ۇگىت-ناسيحات جۇمىسىنا بۇكىل ەل بويىنشا 7,5 مىڭنان استام بەلسەندى قاتىسىپ جاتىر. پاراقشالاردى تاراتۋ، پلاكاتتاردى جاپسىرۋ سىندى ءتۇرلى فورماتتاعى جۇمىستى جالعاستىرامىز. سونىڭ ىشىندە وسىنداي ەكسپرومت-كەزدەسۋلەر دە بار»، - دەدى رەسپۋبليكالىق قوعامدىق شتاب مۇشەسى نۇرجان جەتپىسبايەۆ.

الماتىدا سايلاۋشىلارمەن ەكسپرومت-كەزدەسۋ «MEGA Park» ساۋدا ويىن-ساۋىق ورتالىعىندا ءوتتى. حالىقتىق كواليتسيانىڭ بەلسەندىلەرى پاراقشالار تاراتىپ قانا قويماي، قالا تۇرعىندارىنىڭ سۇراقتارىنا جاۋاپ بەردى.

جاقىن ارادا «ەسىكتەن ەسىككە» اكسياسىن وتكىزۋ جوسپارلانىپ وتىر. ونىڭ اياسىندا رەسپۋبليكالىق قوعامدىق شتاب مۇشەلەرى ءۇي-ءۇيدى ارالايدى.