قاراعاندىلىق وقۋشى اعىلشىن ءتىلىن ۇيرەنۋگە ارنالعان قوسىمشا جاسادى

قاراعاندى. قازاقپارات - قاراعاندى وبلىسىنىڭ وقۋشىسى اعىلشىن تىلىندەگى سوزدەردى ەستە ساقتاۋعا ارنالعان موبيلدىك قوسىمشا جاسادى، دەپ حابارلايدى قازاقپارات ءتىلشىسى.

ارنەللا تولەگەن نازاربايەۆ زياتكەرلىك مەكتەبىنىڭ توعىزىنشى سىنىپ وقۋشىسى. ول موبيلدىك قوسىمشانى جاساۋ ءۇشىن ءبىر جىلعا جۋىق جۇمىس ىستەدى. جاقىندا عىلىمي جوبالار بايقاۋىنىڭ جەلىلىك كەزەڭىندە ءوز جوباسىن ۇسىندى.

«قوسىمشا ستۋدەنتتەرگە فيزيكا، حيميا، بيولوگيا، ينفورماتيكا بويىنشا اعىلشىن تىلىندەگى تەرميندەردى قايتالاۋعا كومەكتەسەدى. ەندى ءبىز ونى جاقسارتۋ جانە App Store-دا ورنالاستىرۋ ءۇشىن سىناقتان وتكىزۋدى جوسپارلاپ وتىرمىز»، - دەيدى ارنەللا.

ايتا كەتسەك، بيىلعى بايقاۋعا قاراعاندى نازاربايەۆ زياتكەرلىك مەكتەبىنىڭ وقۋشىلارى 42 جوبا ۇسىندى.

توعىزىنشى سىنىپتا ءبىلىم الاتىن تاعى ءبىر وقۋشى - امەلي قاجىبەكوۆا فيزيكا مەن بيولوگيانى ينتەگراتسيالىق زەرتتەۋ بويىنشا جوبا جاسادى.

«مەنىڭ جوبام فيزيكا مەن بيولوگيانى ينتەگراتسيالانعان زەرتتەۋگە - ەسەپتەر جيناعىن جاساۋعا ارنالعان. ول ەكى جاراتىلىستانۋ عىلىمىن بىرىكتىرۋ ارقىلى وقۋشىلاردىڭ وقۋ تيىمدىلىگىنىڭ پايىزىن ارتتىرۋعا باعىتتالعان»، - دەپ ءبولىستى وقۋشى.

عىلىمي جوبالار بايقاۋى ەكى تۋردا وتەدى: 17- 22- قازان ارالىعىندا - ونلاين- كەزەڭ؛ كۇزگى دەمالىستا - ناقتى رەجيمدە الماتى مەن استانادا.

بايقاۋعا 16 سەكسيا بويىنشا ەلىمىزدىڭ بارلىق وڭىرىنەن 800-دەن استام وقۋشىدان 550-گە جۋىق جوبا ۇسىنىلدى.

اۆتور

اگاتا مۋحامەدجانوۆا