كۇزگى تۇماۋ قاۋىپتى
قالا اكىمدىگىندە وتكەن ارنايى بريفينگتە ەلوردالىق دەنساۋلىق ساقتاۋ سالاسىنىڭ باسشىلارى وسى ماسەلەگە نازار اۋدارىپ، قازىرگى تاڭداعى ەپيدەميولوگيالىق احۋالعا باعا بەردى.
استانا قالاسى قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى بەرىك كايكەنوۆ جانە قالانىڭ باس مەملەكەتتىك سانيتار دارىگەرى سارحات بەيسەنوۆا قاتىسقان بريفينگتە جەدەل رەسپيراتورلى ۆيرۋس ينفەكسياسى مەن تۇماۋدىڭ قالادا قالاي اسقىنىپ تۇرعانى ايتىلدى. دەرەكتەرىنە سۇيەنسەك، بيىل 29-قىركۇيەك پەن 12-قازان ارالىعىندا ەلوردا تۇرعىندارى اراسىندا جەدەل رەسپيراتورلى ۆيرۋس ينفەكسياسىن 7146 ادام جۇقتىرعان. 100 مىڭ تۇرعىنعا شاققانداعى قارقىندى كورسەتكىشتەردى سالىستىرعاندا بيىلعى ماۋسىمداعى اۋرۋ كورسەتكىشى الدىڭعى جىلدان %19 تومەن ەكەنى بايقالدى.
- ءدال قازىر استانادا ج ر ۆ ي بويىنشا اۋرۋ جۇقتىراتىندار سانى ارتتى، مۇنى ءبىز اۋرۋحاناعا ءتۇسىپ جاتقان جۇكتى ايەلدەر مەن بالالار سانىنان ءبىلىپ وتىرمىز. قىركۇيەك ايىنىڭ سوڭىندا كۇنىنە اۋرۋحاناعا 3-4 ايەل عانا تۇسسە، قازىر كۇن سايىن 14-16 جۇكتى ايەل كەلىپ جاتىر. ولاردىڭ دەم الۋ جۇيەسىندە قيىندىق جوق، كوروناۆيرۋس تا انىقتالمادى، - دەيدى ب. كايكەنوۆ.
دارىگەرلەر تۇماۋدىڭ بەلگىلەرىنە تاعى ءبىر رەت توقتالىپ، ولاردى تىزبەكتەدى. دەنە قىزۋىنىڭ كوتەرىلىپ، °C 39-40,5 قا دەيىن جەتۋى، بۋىن مەن بۇلشىق ەتتىڭ قاقساپ اۋىرۋى، باس پەن كوزدىڭ اۋىرۋى، السىزدىك، ەنجارلىق، اسقا تابەتتىڭ بولماۋى نەمەسە تومەندەۋى، مۇرىن ءبىتىپ، قۇرعاق جوتەلدىڭ قويماۋى، تاماقتىڭ اۋىرۋى، كەيدە جۇرەك اينىپ، لوقسۋ، ءىش ءوتۋ دە تۇماۋ بەلگىلەرىنە جاتادى.
- تۇماۋ مەن ج ر ۆ ي ەكەۋىن بىرىنەن- ءبىرىن اجىراتۋ قيىن. ءبىر ايتا كەتەرلىگى، ۆاكسيناتسيا عانا مىقتى پروفيلاكتيكالىق شارا، تۇماۋعا قارسى ەكپە سالدىرىپ، اۋرۋدىڭ الدىن الۋعا بولادى. بيىل استاناعا رەسەيدەن «گريپپول+» ەكپەسىنىڭ 160 مىڭ دوزاسى جەتكىزىلدى. بۇگىنگە دەيىن ەكپەنى 130 مىڭنان استام ەلوردالىق ازامات الدى. ولاردىڭ 32 مىڭى - بالالار. سونىمەن قاتار 4 مىڭنان استام جۇكتى ايەل مەن 31 مىڭعا جۋىق سوزىلمالى اۋرۋى بار ادامدار ەكپە سالدىردى. حالىقتىڭ تۇماۋعا قارسى ەكپەگە دەگەن سۇرانىسى ارتقانى بايقالادى، - دەيدى س. بەيسەنوۆا.
جەرگىلىكتى بيۋدجەت قارجىسىنا الىنعان ەكپەنى قالاداعى 43 باستاپقى مەديتسينالىق سانيتارلىق كومەك بەرەتىن مەديتسينالىق ۇيىمدا سالدىرۋعا بولادى.
- تۇماۋعا قارسى ۆاكسينا الماعان ادامداردى تەزدەتىپ ۆاكسينا الۋعا جانە تۇرعىلىقتى جەرى بويىنشا ەمحانالارعا بارۋعا كەڭەس بەرەمىن. ۇيىمدار مەن كاسىپورىندار باسشىلارى، وزدەرىڭىز باسقارىپ وتىرعان ەڭبەك ۇجىمىن يممۋندىق قورعانىستى ۋاقىتىلى الۋىن نازاردا ۇستاۋىڭىزدى سۇرايمىن. سەبەبى تۇماۋدىڭ الدىن الۋدىڭ ەڭ ءتيىمدى ءادىسى دەر كەزىندە ۆاكسيناتسيالاۋ ەكەنىن اتاپ وتكىم كەلەدى. تۇماۋ ۆيرۋسى جىل سايىن مۋتاتسياعا ۇشىرايدى، سوندىقتان تۇماۋعا قارسى ۆاكسينانى جىل سايىن ەپيدەمياعا دەيىنگى ماۋسىمعا (قازان- قاراشا ايىندا) دەيىن الۋ كەرەك. ۆاكسينا العاننان كەيىن يممۋنيتەت 14 كۇن وتكەن سوڭ قالىپتاسادى جانە كەلەسى ماۋسىمعا دەيىن ساقتالادى، - دەدى باس سانيتار دارىگەر.
مامانداردىڭ ايتۋىنشا، استانادا تۇماۋدى ەپيدەميولوگيالىق جانە زەرتحانالىق باقىلاۋ جۇرگىزۋ ارقىلى قاداعالاۋدى 8 مەديتسينالىق ۇيىم جۇزەگە اسىرۋدا. ولار جىل بويى تۇماۋعا ۇقساس بەلگىلەرى بار ناۋقاستاردان ىرىكتەي وتىرىپ سىناما الادى. ۆيرۋس انىقتالعان جاعدايدا تەكسەرۋ ناتيجەسى ۆيرۋستى گەنەتيكالىق تەكسەرۋگە جىبەرىلەدى. بۇل ماقساتتى توپتار اراسىنداعى ەپيداحۋالعا باعا بەرۋگە سەپتىگىن تيگىزەدى.
رايحان راحمەتوۆا
«استانا اقشامى» گازەتى
